Shillong, Nohprah, 07: Watla u Bah Bull Nongjop Lyngdoh u la khladnoh na kane ka sla pyrthei la 29 snem mynshwa hynrei ka Khasi Students Union (KSU) kam shym la klet noh ïa une u nongïalam barim jong ka seng uba la len lade bad uba la aiti ïa ka la jong ka jingim na ka bynta ki dawbah jong ka jaidbynriew.
Ha ka sngi Palei, ka KSU ka la rakhe kynmaw burom ïa ka lyngkhuh sngi ïap kaba 29 snem jong u Bah Bull da kaba leit buh syntiew hakhmat u durmot uba ka seng ka la shna pynsahkynmaw ha ka shnong Malki, Shillong.
Ha kane ka sngi, la ïashim bynta lang da ki dkhot bad ki nongïalam jong ka KSU ba la lamkhmat da u General Secretary u samla Donald V. Thabah ryngkat lang bad ki bahaing hasem jong u Bah Bul kynthup i para kynthei, Kong Hana Lyngdoh.
Ka KSU ka la pynmih ruh da ka jingthoh lyngkot shaphang ka jingim bad ki kam jong u Bah Bull u la leh mynba u dang im ha kane ka sla pyrthei kum u nongïalam baradbah jong ka KSU.
U samla Donald Thabah haba kren ha kane ka jingïalang balyngkot u la pynkynmaw ïa ki kam radbah jong ka KSU mynba u Bah Bull u la shimti kum u nongïalam jong ka seng ha u snem 1983 haduh u snem 1990.
U la ïathuh ruh ïa ka jingkren jong ki nongïalam ka All Assam Students Union (AASU) kiba ong ba u Bah Bull u dei shisha u nongïalam u bym lah shuh ban ïanujor badno badno ruh.
“U Bah Bull Lyngdoh u la khladnoh dang ha ka rta kaba 42 snem. Ha shwa ba u khlad, u la im ïa ka jingim basuhsat namarba ha ka jingïakhih pyrshah ïa ki Nepali ha u snem 1987 bad ka jingïakhih pyrshah ban wanrah ïa ka lynti Rel ha kane ka jylla ha u snem 1989, u Bah Bull u la shah pyntyrha, shah bom shah tied, shah pynsajia ha ki bor jong ka aiñ tad haduh ba ka met jong u kan da khrew. U la im ïa ka jingim kaba jynjar hynrei um sngew eiei, kaei kaba u la leh, ka la wanrah ïa ka jingshngaiñ jong ka jaidbynriew,” la ong u samla Thabah.
“Shibun tylli ki shnong Khasi kiba la dei ban kylla long ki shnong Nepali, kum ka shnong Mawlai, Mawprem bad Nengmensong, hynrei dei ka jingïakhun jong u (Bah Bull). Mynshwa ka Ribhoi ka dei kaba dang hap hapoh ka East Khasi Hills, ïa kaba la tip kum ka Ribhoi Subdivision bad ki poiei ki dawa ban pynkylla ïa ka Ribhoi Subdivision sha ka Gorkha Subdivision. Dei kane, kaba pynlong ïa ki nongïalam barim, kum u Bah Bull N. Lyngdoh, Bah Herlambok War, kim lah ban shah bad ki hap ban mih ban ïakhun haduh shisnem lynter tad haduh ba ki mynder ri kin da hap ban phet na ka Bri u Hynñiewtrep,” la ïathuh u General Secretary ka KSU.
Haba pynpaw ba ka KSU ka la shah kynthoh laiphew jait ha kiwei pat ki jaidbynriew, u Samla Thabah u la ong, “kiwei ki jaidbynriew ki bym dei na ka jaitbynriew jong ngi, ki kynthoh, laiphewjait laiphew rukom bad ki kynnoh ym tang ïa u Bah Bull hynrei ïa baroh ki nongïalam ka KSU bad ïa baroh ki dkhot ka KSU. Ki kynnoh ba ngi leh donbor, pynïapher jaidbynriew, bad pynisih jaidbynriew, hynrei ngi kiba don hangne ha la ka jong ka khyndew ka shyiap ngi tip bha ïa kaei kaba ngi leh bad kaei kaba u Bah Bull u leh.”
“Nalor ki nongshun jong ka jaidbynriew, ki don ki kruiñ kiba long ki nonglilam ïa ka jaidbynriew jong ngi, kiba pyndonkam ïa ka jinglong jong ka jaidbynriew jong ngi, ban ïa bishni, ban ïa peit matdong iwei ïa iwei bad shna ïa ki khana lamler pyrshah ïa ki nongïalam ka KSU, naduh ka por u Bah Michael Syiem, Bah Paul Lyngdoh haduh ka kane ka khyllipmat ba mynta,” la kynthoh une u nongïalam ka KSU bad bynrap, “ka jingthmu ba shapoh jong ki, kam dei ba ki sngewkhia ïa ka jaidbynriew lane ba ki sngewkhia ba ka KSU ka long kum u diengpynkiang ïa ka roi ka kiew, hynrei ka jingthmu jong ki ka dei ban pynhun ïa ki mynder ri kiba la thong da ki spah tyngka.”
U la ong ba ha ki 45 snem ba ka KSU ka la ai jingshakri ïa ka jaidbynriew kam pat ju shet kylla ne ban randien na ka bynta ki dawbah ka jaidbynriew.
