Nongstoiñ, Nohprah, 07: Watla ka elekshon sha ka Khasi bad Jaiñtia Hills Autonomous District Council kam pat thikna haduh lano kan long hynrei ki nongkyrshan jong ka Hill State People Democratic Party (HSPDP) Nongstoiñ Unit ki la kwah eh ba ki nongïalam ba hakhlieh jong ka party kin jied noh ïa ki nongkitkam jong ka party hapoh ka Nongstoiñ Constituency.
U Bah Ekstarly Lyngkhoi uwei na ki nongkyrshan baradbah jong ka HSPDP uba long ruh uwei na ki Volunteer ba hakhmat eh ha ka por jong ka jingïakhih Hill State ha ka jingïakren bad u nongthoh khubor u la ong, hadien ba ki nongïalam jong ka party ki la weng noh ïa baroh ki nongkitkam jong ka Nongstoiñ Unit ki nongkitkam ki la lum ïa ka jingïalang ha ka 27 tarik u bnai baladep ha Nongstoiñ hynrei na ka liang jong ki nongkitkam kiba la shah weng kim shym la khot satia ïa u ha ka jingïalang bad um tip satia kaei ka daw kaba kim shym la khot satia ïa u.
Haba kylli, la u don jingtip neem kiei ki mat ba ki ïakren ha ka jingïalang, u Bah Lyngkhoi u la ong, “haduh mynta ngam pat tip satia kaei ka jingthmu jong ki haba ki lum ïa ka jingïalang. Ha ka jingshisha ki nongïalam jong ka Central Excecutive Committee (CEC) ka Party ki la dei ban shimkhia ban thung noh da ki nongkitkam kiba thymmai ha ka jaka jong kiba la shah weng bad ban pyntip ruh sha baroh ki nongïalam jong ka District na ka bynta ban ïatai ïathir sani bha kumno ban pynkhlaiñ biang ïa ka party hapoh Nongstoiñ Constituency kaba dei ka jabieng jong ka HSPDP naduh ka por ba ka jingïakhih dawa jylla ba pura ka la sdang.
