Shillong, Ïaïong, 25: U Symbud Myntri Rangbah ka Jylla uba khmih ïa ka tnat Kam Pohing Bah Prestone Tynsong ha ka sngi Thohdieng u la kular ban phah pahara da ki bor Pulit phyllaw jong ka skulbah North Eastern Hill University (NEHU) hadien ka jingshah shoh pynmynsaw jong uwei u nonghikai.
Ha ka jingïakren bad ki lad pathai khubor, u Bah Tynsong u la ong ba ka ain kan sa leh la ka jong ka kamram pyrshah ïa kito kiba donkti ban shoh pynmynsaw ïa u Assistant Orofessor jong ka Hindi Department ha NEHU.
“Nga ladep bthah ïa u Superintendent of Police (SP) bad ïa ki bor jong ka aiñ ban pynthikna ïa ka jingshngaiñ bad ba ka phyllaw jong ka NEHU ka dei ban long kaba shngaiñ,” u la ong.
Haba kylli halor ki lad jingïada ba la shim, u Bah Tynsong u la ong, “balei ngan shu ïathuh ïa phi? Nga la ïathuh ïa phi ba ngi ladep pynbiang ïa ki bor pahara. Na kata ka daw ngam donkam shuh ban da ïathuh bniah ïa phi, katno ngut, balei, kaei bad haei namarba ka kamram jong ka Sorkar Jylla ka long ban pynthikna ïa ka shongsuk shongsaiñ bad ka jingshngaiñ ïa baroh, la ka long ïa ki samla pule, la ka long ïa ki nonghikai bad baroh ki dei ban ïoh ïa ka jingshngaiñ.”
Da kaba kyntu ba ym khih jingmut, u Symbud Myntri Rangbah u la ong, “sngewbha wat khih khuslai jingmut namar kumba ka longmynta na ka liang jong ka Sorkar, ngi ladep pynkhlaiñ ïa ki bor pahara bad ngin pynthikna ruh ba manla uwei pa uwei kin shngaiñ khamtam kito kiba sah ne kiba leit sha NEHU campus.”
U la ong ba ka dei ka kamram jong ka Sorkar ban ïada katkum ka jinglong jingman. Ki bor jong ka aiñ ne ka tnat Pulit ki la leh la ka jong ka kamram ban pynthikna ïa ka jingshngaiñ jong ki samla pule, ki nongtrei bad ki nonghikai ha NEHU.
Ha kaba ïadei bad kane ka jingjia, u Assistant Professor Alok Singh u la mudui da ka ejahar pyrshah ïa u President ka NEHUSU u samla Sandy Sohtun bad ïa ki san ngut kiwei pat halor ka jingkynnoh ba ki la shoh pynmynsaw ïa ha ka kamra treikam jong u ha ka janmiet sngi Palei.
