Shillong, Nailur, 08: Ka Meghalaya SSA School Association (MSSASA) ha ka Lah Sngi u Blei ka la pan jingpynshai na ka tnat Pule Puthi jong ka Sorkar Jylla ha kaba ïadei bad ka jingpynmih hukum jong ka Iingbishar Supreme Court ha ka 1tarik Nailur, 2025 ba ki nonghikai kynthup wat ïa kiba la don lypa ha ka kam hikai skul ki dei ban pyndep ïa ka Teacher Eligibility Test (TET) hapoh ar snem.
U President jong ka MSSASA u Bah Aristotle C. Rymbai ha ka jingïakren bad ki lad pathai khubor hadien ka jingïakynduh ïa u Commissioner and Secretary uba khmih ïa ka tnat Pule Puthi u Vijay Kumar Mantri u la ïathuh ba ka tnat kan dang bishar bad kan sa ai jingtip sha ka seng halor kane.
Ka jingpynmih jong ka iingbishar Supreme Court ïa ka rai ka long hadien ka jingshim bishar ïa ka mukotduma jong ka Anjuman Isaat E-Taleem Trust pyrshah vs The State of Maharashtra & Others (Civil Appeal No. 1385/2025) kaba bthah ïa baroh ki nonghikai, kynthup ïa kito kiba la don ha ka kam hikai skul ba kin dei ban pyndep ïa ka TET hapoh ar snem bad lada kino kino ki nonghikai ki bym pas ïa ka eksamin TET hapoh ka por ba la buh, kin hap ban iehnoh ïa ka kam, kin hap ban shongthait noh bad kin ïoh lut ïa ki jingsiew ba ki dei ban ïoh.
“Kum ka kynhun ki nonghikai skul ngi la pan jingpynshai na u Commissioner and Secretary ka tnat Pule Puthi khnang ban ïoh jingshai ha kano ka rukom ka Sorkar Jylla ka pyntreikam ïa ka rai jong ka Iingbishar Supreme Court ha Meghalaya,” long u Bah Rymbai ha ka jingïakren bad ki lad pathai khubor.
“Ngin ap shwa ïa ka nongrim ba ka Sorkar Jylla ka ieng halor ka rai jong ka Iingbishar Supreme Court bad ynda ka Sorkar ka la shim rai halor kane, ngi ruh ngin sa ïakren halor kane ka kam,” ong u Bah Rymbai.
Haba kylli, u la ong, “ngi kwah ba ka Sorkar lada ka pynlong ïa ka TET ruh kan kham pynjem noh khyndiat khamtam ïa ki nonghikai kiba la don lypa ha ka kam namarba ki don ki nonghikai kiba la don lypa ha ka kam hikai skul la 10 snem, 15 snem, 20 snem bad 25 snem ruh.”
