Shillong, Jylliew, 27: Ka Iingbishar Meghalaya High Court ha ka sngi Thohdieng ka la pdiang ïa ka Public Interest Litigation (PIL) kaba la mudui da ka Syngkhong Rympei Thymmai (SRT) kaba dei ka Society kaba la register, kaba tuklar ïa ka jingai syrnod Scheduled Tribe da ka tnad Social Welfare.
Ka Society kaba kynthup ïa ki dkhot na ka jaidbynriew Khasi ka don ïa ka ophis ba ladep register ha Madan Laban, East Khasi Hills District.
Ka mat ba kongsan ba la pynpaw ha ka jingujor ka dei shaphang ka jingai ïa ki syrnod Scheduled Tribe sha ki Khasi kiba shim ïa ka jait jong u kpa ne ka kmie jong ki bad ïa ki kynthei bym dei ki Khasi kiba jied ban shim ïa ka jait jong u tnga jong ki.
Halor ka jingpdiang ïa kane ka PIL, ka Division Bench kaba kynthup ïa u Chief Justice IP Mukerji bad u Justice W Diengdoh ha ka hukum ka la bthah ïa ka tnad District Council Affairs (DCA) ba kan ai ïa ka kaiphod halor kane ka kam.
“Ha ka tarik ba la buh, ka tnad District Council Affairs kan ai ïa ka kaiphod ha kane ka Iingbishar kaba ïadei bad ka jingai ne ki jingmut jong ka halor ka jingai ïa ki syrnod Scheduled Tribe sha ki Khasi kiba jied ban shim da ka jait jong u kpa ne ka kmie jong ki bad sha ki kynthei kiba jied ban shim ïa ka jait jong u tnga jong ki,” la ong ka hukum.
Ka Bench ka la kdew ba ka aiñ Khasi Hills Autonomous District (Khasi Social Custom of Lineage) Act, 1997, ka treikam ïa baroh ki Khasi kiba don ha Khasi Hills District bad ka ailad ruh ïa ka jingpynrung kyrteng bad ka jingai ïa ki syrnod Khasi Tribe.
Hynrei ka Iingbishar ka la pynpaw ba ka kwah ban sngewthuh kumno ka jingjied jong u briew ban shim ïa ka jait jong ka kmie ne u kpa jong u ka lah ban pynkylla ïa ka jingkitkhlieh jong ka bor katkum ka aiñ ban pynrung kyrteng ïa uno uno u Khasi bad ban ai ha u/ne ka “Tribe Certificate.”
Ka Iingbishar ka la bthah ïa u nongujor ban ai kopi ïa ka jingujor sha baroh ki nongshah mudui lait noh tang ka Jylla, kaba la mihkhmat da ki Nongïasaid aiñ.
U nongmudui ka SRT u la pynpaw ba ha ka 21 tarik, Naitung, 2020, u la pyntip sha ka ophis Deputy Commissioner, East Khasi Hills District da kaba pynskhem ïa ka jingai jingmut ba la ïoh na ka tnad District Council Affairs ba ka Lineage Act, 1997 kam shym la khang ban ai ïa ka syrnot Schedule Tribe na ka bynta kito kiba aplai ban shim ‘ïa ka jait la ka dei na u kpa ne ka kmie bad ka rukom shim jait na u tnga da ka tnga ka bym dei ka Khasi.”
Da ka jingpyntip kaba hadien ha ka 21 tarik, Jymmang, 2024, kajuh ka tnad Social Welfare ka la weng noh ïa ka shithi jong ka 21 tarik, Naitung, 2020, kynthup ïa ka rai kaba don ha ka. U nongujor lyngba u nongïasaid aiñ u la pynpaw namar kane ka jingpyntip, ka jingai syrnod Scheduled Tribe sha ki Khasi ka la shah pynsangeh noh ha ka Sorkar.
