Shillong, Jylliew 11: Ka Meghalaya Human Rights Commission (MHRC) ka la khot hajir ia u Superintendent of Police jong ka East Khasi Hills u Rituraj Ravi ha ka 20 tarik mynta u bnai ha kaba iadei bad ka jingjia ha ka miet shiteng synñia ha ka 9 tarik mynta u bnai ha kaba u SP ryngkat bad ki Pulit ki la leit rung ha ka jaka shah thngan ka Kong Bindas Syiem ha Parking Lot kaba don markhap bad ka ophis Additional Secretariat, Shillong.
Ka Commission ka la pan ruh ia ka kaiphod kaba bniah halor kane ka jingjia na ka Director General of Police (DGP) ka Jylla Meghalaya.
Ka jingshimkhia jong ka Commission ka long hadien ba u Bah Enlang Sawian uba dei u nongsaid-aiñ bad ha kajuh ka por u nongialam jong ka Hynñiewtrep Youths Council (HYC) u la ujor sha ka Commisson halor kane ka jingjia.
Kum ban shu pyntip hangne, ka Voice of the People Party ba la lamkhmat da u MLA ka Mawlai Constituency Bah Brighstarwell Marbaniang ka la leit ujor ha u Inspector General of Police (Law and Order) halor kane ka jingjia.
Ka Khun Hynñiewtrep National Awakening Movement (KHNAM) ba la lamkhmat da u Working President Bah Thomas Passah ka la aiti da ka jingthoh ujor sha u Chief Secretary ka Jylla u Bah DP Wahlang ba un tuklar ia katei ka jingjia namarba ki paidbah ki la duh ia ka jingshaniah na ka tnat Pulit.
Ka KHNAM ka la dawa ruh ba ka Sorkar ka dei ban pynkynriah kam noh mardor ia u Rituraj Ravi na East Khasi Hills District.
