Shillong, Jylliew, 11: Ki nongtrei ka tnat Pule Puthi kiba don hapoh ka shatri jong ka All Meghalaya SSA Non-Teaching Staff Association ki la ai por 15 sngi ia ka Sorkar Jylla bad kumjuh ruh ia ka tnad Pule Puthi ba kin pyntreikam noh ia ka jingsiew tulop ba thymmai hynrei lym kumta ki la byrngem ban mih paidbah sha surok ban pynlong da ka jingiakhih.
Ha ka jingiakren bad ki lad pathai khubor, ka President jong ka Association ka Kong Jennifer J. Synrem ka la ong, lada jia ba ka Sorkar kam lah ban pyntreikam noh ban siew ia ka tulop ba thymmai kin sa shim da kiwei pat ki lad ki lynti ba tyngeh pyrshah ia ka Sorkar.
Ka la ong ba kane ka jingdawa jong ka Association ka long halor ka jingdor jong ki mar ki mata, ki marbam mardih ha iew ha hat kat haduh ba ka ktah ia ka pla iarong namar ka jingrit ka tulop kaba ki ioh mynta.
U General Secretary ka Association Bah Barikupar Mylliemngap u la kyrpad ia baroh ki nongtrei kiba don sha kylleng ki district ka Jylla ba kin long kiba la pynkhreh ban mih paidbah lada ka Association khot pynlong ia ka jingiakhih ba jaijai katkum ka riti synshar paidbah ha kano kano ka por.
