Shillong, Nohprah, 12: Ka United Democratic Party (UDP) bad ka Hill State People’s Democratic Party (HSPDP) ha ka sngi Baar ka la shim ïa kawei ka rai ban ïatreilang hapoh ka shatri jong ka Regional Democratic Alliance (RDA) na ka bynta ka elekshon Lok Sabha bad elekshon MDC, ki ban sa long ha u snem ban wan.
Ka RDA shen kan sa pynbna ïa u kyrtong na ka bynta ka Shillong Parliamentary Seat, ba la mihkhmat mynta da u MP ka Seng Congress u Bah Vincent H. Pala.
Ha ka jingïakren bad ki lad pathai khubor hadien ba la wai ka jingïalang, u Chairman jong ka RDA u Bah Metbah Lyngdoh u la ong, “mynga ngi la sdang ïa ka jingïakren ha kaba ïadei bad ka elekshon MP bad ka elekshon MDC. Ngi la rai ban ïakhun ïa ka elekshon MP bad ka elekshon MDC (kum ka RDA).”
U Bah Metbah u la ong ba shen ka RDA kan sa ïakynduh biang ban shim rai ha kaba ïadei bad ka jingshim rai ban pynieng ïa u kyrtong monlang jong kine ki ar tylli ki seng sainpyrthei na ka Shillong Parliamentary Constituency.
“La bthah ïa ki dkhot ba hapoh shi sngi ne ar sngi ba ngin ïakynduh biang ban shong bad ban shim rai noh halor u kyrtong ka RDA,” u la ong.
Haba pynpaw ba ka ïa ban pynbna ïa u kyrtong kam pat poi, u Chairman ka RDA u la ong, “ngi dang don ha ka lynti ban ïasyllok bad kiwei kiwei de ki kam ha kaba ngi la ïakren bad ïa kane kajuh ka mat yn sa ïakren bïang ha ka jingïalang ka ban sa long.”
Haba kylli, u Bah Metbah u la ong ba ym pat don kyrtong na ka RDA.
“Ngim pat ïakren ïa ka kyrteng jongno jongno ha ka RDA hynrei ngin sa pynbna ha ka por kaba biang, ïa kaba ngin sa ïakren ha ka jingïalang ka ban sa long shen,” u la ong.
Ha kawei pat ka liang u Bah Metbah u la ïathuh ba hynriew ngut ki dkhot na ka HSPDP bad san ngut na ka UDP ki la shah kynthup kum ki dkhot jong ka RDA. Mynta ka jingdon jong ki dkhot ka RDA ka la kynjoh sha ka 15 ngut.
