Shillong, Nohprah, 12: U MLA jong ka Voice of the People Party (VPP) na North Shillong Constituency u Bah Adelbert Nongrum ha ka Sngi Baar ula pynphai nia ia ka jingkynthoh jong u Symbud Myntri Rangbah ka Jylla u Bah Prestone Tynsong da kaba ong, “ka Voice of the People Party kan ym ialam bakla ia u paidbah.”
Ha u kyrwoh ba la phah sha ki lad pathai khubor lyngba ka Video, u Bah Nongrum u la ong, “nga don ha Riwai, Pynursla, bad nga kwah ban kren halor ka jingkren jong u Bah Prestone halor ka ishu Them Iewmawlong ba u ong ba um kwah ban pynlut kai ia ka por. Nga ruh ngam kwah ban pynlut kai ia ka por hynrei ngam iahap satia ba phi ong ia ki nongialam VPP wat ialam bakla bad wat ym leh politik. Hynrei nga kwah ban pynkynmaw ba ka VPP kan ym ialam bakla ia u paidbah. Hynrei ngi kwah ban ong tang kawei namaarba la pynkha ia ka VPP ym dei tang namar ka politic hynrei namar ka polisi.”
“Kaba ar, nga kwah ban pynpaw ba ka jaka ka dei ka jingim bad na kata ka daw kane ka dei ka jingim bad ka jingiap na ka bynta ki pateng ki ban sa wan,” u la ong.
“Halor ka jingong jong u Bah Prestone ba um don por ban pynshai, hynrei lada u Bah Prestone uba dei u Symbud Myntri Rangbah bad u Chairman jong ka High Level Committee (HLC) lada phim don por te mano ban shim ia kata ka por ka jong phi. Ki sengbhalang ki ong ban sa pan da ka RTI, nga ruh nga kular ba ngan iai buddien la ka long ha madan lane ha Ingdorbar Thawaiñ ka Jylla,” la ong u Bah Nongrum.
“Kane kam mut ba nga la long uba nga shun bad nga isih ia kiwei pat ki para nongshong shnong, hynrei ka long kaba isynei ia ka shong ka sah jong ki (briew ha Them Iewmawlong) ka long kaba isaitmet haduh katta katta. Tang kiba iohi, ki sngewthuh katno ka jingeh na ka bynta jong ki,” la bynrap u Bah Nongrum.
“Ka dei ka kamram jong nga kum u kpa jong ka Constituency ban iakhun na ka bynta jong ki (briew kiba sah ha Them Iewmawlong) ruh halor ka jingsngew briew ba dei ban pynkynriah ia ki. Ka koit ka khiah kam don, ka jingkhapngiah ruh ka long kaba shyrkhei,” u la ong.
Haba buh jingkylli ia u Symbud Myntri Rangbah Bah Prestone Tynsong, u Bah Nongrum u la ong, “nga ai ka jingiaroh ia ka jingshimkhia jong ka Sorkar. Bad ka jingkylli mynta, ka long balei phi hap ban da ai kyrpang ia kata ka jaka? Lada ia ki nongtrei ka Municipal phi la rah sha Quarter jong ka Municipal ka biang palat Sorkar MDA. Hynrei balei pat ia kiwei ki nongtrei jong kiwei ki tnat treikam ka Sorkar phim aiti sha ki tnat ba dei peit ba kin pynkynriah sha ki Quarter jong ki bad ka la lait ka jingai ia ka jaka kaba 1.4 akar?
“Nga sngew iahap bad u Bah prestone ka long ba ka jaka ba la ai kam dei ban long trai da ki briew kiba sah ha Them Iewmawlong, haoid, kan long trai ka Municipal hynrei balei phi hap ban ai pat ia katei ka jaka?” la kynthoh u Bah Nongrum.
