Shillong, Jymmang, 08: Ka St. Mary’s Girl Higher Secondary School, Shillong ka la long ka skul kaba la ioh ia ka kyrdan First Ten ha ka resol Higher Secondary School Leaving Certificate (HSSLC) Commerce, 2024 ba la pynbna da ka Meghalaya Board of School Education (MBoSE) ha ka sngi balang.
Na kane ka skul, ha ka thup Top Ten, ka samla Ferry Filarisha Wann ka la ioh ia ka kyrdan First Ten, katba ka samla Alphi Clarissa Warjri ka la ioh ia kyrdan ba khyndai.
Ka St. Anthony’s Higher Secondary School, Shillong ka la ioh saw tylli ki kyrdan, kata, u samla Raj Paul ha ka kyrdan kaba ar, ka samla Pinky Kumari ha ka kyrdan kaba lai, ka samla Nearlina Bani Nongbri ha ka kyrdan kaba saw bad u samla Ishuah Kharsohtun ha ka kyrdan kaba san.
Ka Laban Bengalee Boy’s Higher Secondary School ka la ioh ar tylli ki kyrdan, kata, u samla Pongkoch Dutta ha ka kyrdan kaba lai bad u Imazul Haque Laskar ha ka kyrdan kaba phra.
Ka St. Edmund’s Higher Secondary School, Shilong ka la ioh ar tylli ki kyrdan, kata, u samla Ryan Surong Myrthong ha ka kyrdan kaba saw bad ka samla Sneha Paul ha ka kyrdan kaba hynriew.
Ka Don Bosco College (Hr. Secondary Section) Tura ka la ioh ia ka kyrdan kaba lai lyngba u samla Aditya Prasad, ka Shillong College Higher Secondary Education, Shillong ha ka kyrdan kaba hynñiew lyngba u samla Dicky Nongpluh bad ka Alpha Higher Secondary School, ha ka kyrdan kaba shiphew lyngba u samla Jagjot Sing Nongtdu.
Kiba iakhun Regular bad Non-Regular ki long 2,411 ngut katba kiba pas ki long 1,935 bad ka pass percentage ka long 80.26.
Ha ka Vocational Stream kiba iakhun ki long 11 ngut, ki shynrang kiba pas ki long hynñiew ngut bad ki kynthei saw ngut. Ka percentage ka long 100%.
