Shillong, Jymmang 08: Ka Laban Bengalee Boy’s Higher Secondary School, Laban mynta ka kynti ka la ioh hat-trick ha ka jingioh bat ia ka kyrdan banyngkong ha kaba eksamin Higher Secondary School Leaving Certificate (HSSLC) Science Stream ba la pynbna da ka Meghalaya Board of School Education (MBoSE) ha ka sngi Balang.
Ka jingioh hat-trick jong kane ka skul dei lyngba u samla Sohan Bhattacharjee uba la ioh ia ka kyrdan banyngkong eh ha ka Top 10.
Ka Laban Bengalee Boy’s Higher Secondary School, ka la bat ia ka kyrdan banyngkong naduh u snem 2022, 2023 bad mynta u snem 2024. Nalor u samla Sohan Bhattacharjee uba la ioh ia ka kyrdan banyngkong, ka skul ka la ioh khur haduh lai tylli ki kyrdan ha ka Top Ten, kata, ka samla Anikey Pattanayak ha ka kyrdan kaba saw bad u samla Ahijit Deb ha ka kyrdan kaba phra.
Ha kane ka kyrdan Top Ten, u samla Gordon Kupar Nongbri na St. Edmunds Higher Secondary School, Shillong u la ioh bat ia ka kyrdan kaba ar, katba arngut ki samla pule jong kane ka skul ba kynthup ia u samla K. Vansangpuii u la poi ha ka kyrdan kaba hynriew bad u samla Edward Pohlong Lamare ha ka kyrdan kaba khyndai.
Ka St. Anthony’s Higher Secondary School, Shillong kaba ju ioh khur lut ia ki kyrdan ha ki snem ba la leit noh hynrei mynta u snem, la sakhi ba tang lai ngut ki khynnah ki la ioh rung ha ka Top Ten, kata u samla Ar Meker Marpna u la poi ha ka kyrdan kaba lai, ka samla Amebaaihunsha Kharbhih ha kyrdan kaba saw bad ka samla Rilaakor Lamare ha ka kyrdan kaba san.
Ka North Liberty Higher Secondary School, Mookyrdop-Jowai mynta u snem ka la sakhi ba arngut ki samla pule ki la ioh rung ha ka kyrdan kaba hynriew lyngba u samla Weibha Nongtdu Lakiang bad ha ka kyrdan kaba hynñiew lyngba u samla Joshavia Onan Paswet.
Kum ban shu pynkynmaw hangne ba u samla Weibha Nongtdu Lakiang ha ka eksamin SSLC jong u snem 2022 u la wan ha ka kyrdan 4th Position ha ka thup Top-20.
Ka Sacred Heart Boy’s Higher Secondary School, Shillong ka la ioh rung ha ka kyrdan kaba khyndai lyngba u samla Freddy Lyngkhoi bad ka Mairang Presbyterian Science College, Mairang ha ka sien banyngkong eh ka la ioh rung ha ka Top Ten lyngba u samla Kevinstrong Lawryniang uba la poi ha ka kyrdan kaba shiphew.
U samla Kevinstrong Lawryniang u dei uba la ioh bat ia ka kyrdan First Ten ha ka Top-20 ha ka result SSLC, 2021 mynba u dang pule ha St. Thomas Higher Secondary School, Mairang.
Kiba iakhun Regular bad Non-Regular ki long 3,766 ngut katba kiba pas ki long 3,210 bad ka pass percentage ka long 85.24.
