Shillong, Jymmang, 27: Ki nongïalam ka Hynñiewtrep Youths Council (HYC) ha ka Lah Sngi u Blei ki la ai jingmut ïa ka Director General of Police (DGP) ka jylla ka Kong Idashisha Nongrang ba ka tnat Pulit kan thaw noh da ka kynhun kaba kyrpang ne Special Team jong ki Pulit kiba la tip bha shaphang ki kyndon jong ka NDPS Act khnang ba lada ki Pulit ki ïohkem ïa ki snar khaii drok, ynda la poi hakhmat ka Iingbishar, ki nongïasaid aiñ kin ym ïoh daw ban ïasaid na ka bynta ban pan jamin ïa ki snar khaii drok.
Shwa ban pynsngew ïa ki mat kiba ïadei bad ka jingjyllei jong u drok ha ka jylla ka HYC ka la pynkup burom ruh ïa ka Kong I. Nongrang ha ka jingïakynduh ha kamra treikam jong ka ha Police Headquarter, Shillong.
Ha ka jingïakren bad ki lad pathai khubor, u Bah Synrem u la ïathuh ba ka DGP ka la pyntip ba ka Sorkar Jylla mynta ka dang don hapdeng jingpynkhreh ban thaw ïa ka kynhun ki Ophisar Pulit ba kyrpang ne ka Special Team ki ban tohkit beit thik tang ha kaba ïadei bad ka jingïohkem ïa u drok katkum ka NDPS Act.
“Ngi la ai jingmut ïa ka DGP, ba ngi la lap ba ka jingpynshitom ïa ki briew kiba don bynta ha kaba die ïa u drok bad ngi ïohi na ka por sha ka por ba ki Pulit ki kurup ïa u drok uba shongdor da ki klur tyngka hynrei ngi lap ba kine ki briew kiba shah kem ki shah pyllait noh napoh ka Ingbishar namarba bunsien ka rukom tohkit ïa ka jingkem ïa ki nongkhaii drok ka bakla ne kam ïaid katkum ki kyndon jong ka NDPS Act. Ki Investigating Officer bad ki nongsaid aiñ ka Sorkar kim ïaid katkum ka NDPS Act, kiba shah kem ki lait jamin noh,” u la ong.
“Ka DGP ka la ïathuh ba ka Sorkar ka dang pynkhreh ban thaw ïa ka Investigation Team ne ka kynhun tohkit jong ki Pulit Ophisar ki ban tohkit beit thik halor ki case ka NDPS Act,:” la ïathuh u Bah Synrem.
“Ngi la ai jingmut ïa ka DGP ba ka tnat Pulit ka hap ban trei shitom bad ban trei dukhi ban pynthikna ba ka jingwanrah ïa u drok na kiwei pat ki jylla bad na kiwei pat ki ri kam dei ban long kaba suk ban rung hapoh Shillong bad ha kiwei ki bynta jong kane ka jylla Meghalaya,” ong u Bah Synrem.
“Kumba ngi tip, ka Jylla Meghalaya kam pynmih hi ïa u drok, u drok uba poi ha nongbah Shillong bad ha kane ka jylla Meghalaya u dei uba poi na kiwei pat ki jylla bad na kiwei pat ki ri,” u la ong.
Da kaba pynpaw ba ka East Jaiñtia Hills District ka dei ka lynti ïaid jong ki nongkhaii drok katkum ba la paw ha ki lad pathai khubor na ka jingïohkem jong ki Pulit na ka por sha ka por ïa ki nongkhaii drok, une u nongïalam ka HYC u la ong, “ka East Jaiñtia Hills District kaba ka surokbah National Highway ka ïaid lyngba ban pynpoi sha kiwei ki jylla jong ka ri ngi ïohi ba ka jingïohkem ïa u drok ka long kaba bun. Ym tang ha East Jaiñtia Hills, hynrei wat surok lyngba ka Ribhoi District, kine ki dei ki ar tylli ki lynti kiba lehse u drok u ïaid lyngba sha kane ka jylla jong ngi.”
“Ngi la ai jingmut ïa ka tnat Pulit ban tehlakam ïa ka jingwanrung jong u drok sha kane ka Jylla jong ngi da kaba ïatreilang bad kiwei ki Agency ne ki tnat treikam ka Sorkar Jylla ne jong ka Sorkar India ban pynthikna ba u drok uba dei ban poi ha Shillong um dei ban poi,” la ïathuh u Bah Synrem.
“Ka DGP ka la pynthikna ba ka tnat Pulit kan trei borbah ba ka jingwanrah ïa u drok sha kane ka jylla jong ngi kan long kaba jynjar haduh katta katta bad ba ki briew kiba donkti ha kane ka kam kin shem jingeh,” u la ong shuh shuh.
U Bah Synrem u la ïathuh ba ka seng ka la pynkynmaw ïa ka DGP ïa ka section 317 jong ka aiñ Bharatiya Nyay Sanhita 2023 kaba kdew ba kino kino ki briew kiba thied ïa ki tiar ba uwei pat u briew u shu tuh, kin ngat ha ka jingshah pynshitom.
“Ngi la ai jingmut ïa ka tnat Pulit ba kan ai jingpynshai paidbah halor kane ka aiñ khnang ba ki briew kin ym thied ïa ki tiar ba wanrah da ki nongdie drok kiba shu tuh na la ki jong ki ing ki sem,” u la bynrap.
U la ong ba ka seng ka la pynpaw hakhmat ka DGP ba ka long kaba kloi ban ïatreilang bad ka tnat Pulit, ka Dorbar Shnong namarba ka seng kam kwah ban ïohi ïa ka jingjyllei ïa ka jingdih drok ka bym jia shuh tang ha sor Shillong hynrei u drok u la rung wat sha ki shnong nongkyndong.
“Kaba ngi sheptieng ka long ïoh ba u drok u pynduhjait ïa kane ka pateng kaba mynta ka ban buh jingma ïa ka pateng ka ban sa wan. Shwa ba kata kan jia, ba ka jinglaitlan bad ka jingïohmon ban die ïa u drok kan kut noh ha kane ka pateng jong ngi mynta.
