Shillong, Nailur, 11: Ka Kynhun Myntri jong ka Jylla ka la mynjur ïa ka jingkhang pisa jong ka skhim Saubhagya bad Deen Dayal Upadhyaya Gram Jyoti Yojana (DDUGJY), da kaba pynshong nongrim ha ka kaiphod pynshisha kaba khatduh ba la aiti da ka Meghalaya Power Distribution Corporation Limited (MePDCL), watla ka la bthah ban leh eiei pyrshah ïa ki kontraktor ki bym pat lah ban pyndep ïa ka jingtrei kaba T.54 lak.
Kane ka skhim kaba dei ban pynpoi ïa ka bording sha ki thliew iing briew, ka la sahkut na ka daw ka jingsah pongding ki jingtohkit bad ka jingpynshisha.
“Ngi la pdiang ïa kata ka kaiphod bad ngi la mynjur ban khang ïa ka jingkyrshan pisa jong ka Saubhagya DDUGJY bad ïa ki Additional Infra Scheme,” ong u Myntri Rangbah ka Jylla u Conrad K Sangma ha ki lad pathai khubor hadien wai ka jingïalang Kynhun Myntri ha ka sngi Palei.
U Sangma u la pyntip katba ïa ki kaiphod jingkhang khyrdep la aiti sha ka Rural Electrification Corporation (REC) bad sha ki tnad Sorkar Pdeng lai snem mynshwa, la bynshet ïa ka MePDCL ban pynlong wad ïa ka jingpynshisha kaba kham bniah namar ka jingujor halor ki jingbym biang ha ki katto katne ki jaka.
“Hadien ba la pynshisha bunsien, ka MePDCL ka la lap ba na ka jingtrei kaba T.96 klur tyngka kaba la kdew, T.54 lak tylli ki jingtrei ki dang sahteng khlem pat dep,” u la ong da kaba bynrap, “da kaba pynshong nongrim ïa kata, ngi la pdiang ïa ka Financial Closure Report na ka MePDCL bad la ai jingbit mynta ka sngi ïa ka MePDCL ban ïaid shakhmat bad ka jingkhang pisa katkum kane ka kaiphod ba 54 lak ki kam kim shym la pyndep kaba mut ba ka jingsiew ïa kita ki 54 lak kan ym lah bad ïa kiwei pat ki kam kiba ladep, ïa ka jingpynshisha ladep leh bad ïa ka jingsiew ba donkam la pyllait.”
U Sangma u la pynbna ruh da kaba pynshong nongrim katkum ka kaiphod jong ka MePDCL, ka Kynhun Myntri kala rai ban ym siew ïa ki kam ki bym pat dep, kaba la ktah ïa kumba 30-40 tylli ki shnong.
U Myntri Rangbah ka Jylla ula pynpaw ïa ka jingkyrmen halor ka jingmynjur jong ka Sorkar India ïa ka RDSS (Revamped Distribution Sector Scheme) ka ban sa wan, kaba la khmihlynti ba kan kynthup ïa kiba bun ki shnong bad ki longïing.
“Ïa ka RDSS la mynjur da ka Sorkar India kumta shisien ba la pyntreikam ïa kane ngi don ka jingkyrmen ba ngin lah ban kynthup lut kham bun ki shnong bad ïa ki longïing.”
