Shillong, Nailar, 02: Ka Jaiñtia Students Movement (JSM) ha sngi balang ka la phah da ka jingthoh sha u Myntri Rangbah ka Jylla u Conrad Kongkal Sangma lyngba u Deputy Commissioner jong ka West Jaiñtia Hills District u Bah B.S. Sohliya hadien ka jingmih pyrthei jong kawei ka kynhun kieng atiar ha Karbi Anglong.
Ha ka dorkhas ba la soi da u President u Bah L.S. Rymbai bad u General Secretary u Bah R. Dkhar, ka JSM ka la kyntu ïa u Conrad Kongkal Sangma ban ïakren bad u Myntri Rangbah ka Jylla Assam u Himanta Biswa Sarma ban pynthikna ïa ka shongsuk shongshngaiñ jong ki Khasi-Pnar kiba shong basah ha ki shnong kiba hap hapoh ka thaiñ Block-I.
“Ka JSM kan ym shong kli kti ban shim da kino kino ki sienjam kiba tyngeh lada ka United People’s Front of Karbi Longri (UPFKL) ka khrong pisa lane ka pyndik ïa ki Khasi-Pnar kiba sah ha Block-1,” la ong ka dorkhas na ka Seng.
Ka Seng ka la pyntip ruh ba ha u snem 1951 na ka bynta ban pynsuk ïa ka synshar ka khadar, ïa ka Block-I & II kaba hap hapoh ka jingpeit jong ka Jowai Civil Sub Division ba mynshwa la pynngat sha ka United Mikir Hills, District da u Lat barim ka Jylla Assam bad na ki daw ki bym lah ban tip, ym shym la shim shuh ïa ka rai ban pynphai biang ïa ka Block-I & II sha Meghalaya, haba la pynkha ka Meghalaya ka la ïoh ïa ka Jylla bapura ha u snem 1972.
“Naduh u snem 1951 ki jaidbynriew Pnar ki ju mad ïa ki jingshah pyndik balaiphewjait bad ki ngat ruh ha ki jingshah pynshitom ha ka kti jong ki riewbat aiñ lane ha ka kti jong ki lehnoh Karbi kat haduh ba kin da mad ïa ka jingim kaba syrtok bad dei halor kane ka daw ba ki pynim ïa ka jingïai dawa ban pynphai biang ïa ki shnong jong ki sha ka Jylla Meghalaya,” la ong ka Seng.
“Kumba phi ladep tip, ha u snem 2004, da ki spah ngut ki Pnar ki la kylla phetwir sha Sahsniang kaba hap hapoh ka Laskeiñ C&RD Block, West Jaiñtia Hills District namar ka jingsheptieng ïa la ka jong ka jingim na ka jingshah pyndik ha ki lehnoh Karbi, kiba pynshitom da kaba dawa pisa bad siat ïap ïa ki Pnar tang na ki daw barit baria,” la pynkynmaw ka Seng ïa ki jingshah lehbeiñ ki Pnar ha ki snem ba mynshwa.
Ban pynksan shuh shuh ïa ka jingdawa, ka Seng ka la pyntip ruh ba ki Pulit ka Jylla Assam dang shen ki la ïoh kem ïa arngut ki dkhot jong ka United People’s Front of Karbi Longri (UPFKL) ha West Karbi Anglong District.
“Ka lah ban long ba kane ka kynhun kieng atiar ba thymmai ki Karbi kan leh ïa ki kam pyntriem sa shisien da kaba dawa pisa na ki Pnar kiba sah ha Block-I bad kiwei kiwei ki jait jingpynshitom ba har rukom khnang ba ki jaidbynriew Pnar kin ym nud ban pynsngew ïa ki jingdawa ban wan phai sha Meghalaya kumba la leh da ka kynhun kieng atiar Karbi kaba mynshwa.
