Shilllong, Jymmang, 16: Ka Khasi Students Union (KSU) ha ka sngi Palei ka la dawa ïa ka Sorkar ba kan pynbiang ïa ki tiar ki tar kiba ïadei bad ka jingpynlong ïa ka eksamin Central University Entrance Test (CUET).
Ka seng ka la pyntip ba ki samla ki la hap ban ieng laiñ daki kynta namarba kam don kano kano ka jingbthah ba paka ba kin leit sha ki jaka thoh eksamin.
“Ka jingkulmar jingmut ka la pynsuhsat shuh shuh namarba ha ka Admit Card ba la ai da ka NTA la kdew ba ka jaka thoh eksamin ka dei ha NEHU Cluster Building; hynrei ka NEHU ka la buh ar tylli ki jaka thoh eksamin ha Non-Science bad Science Cluster Classroom, khlem da ai ka jingpyntip kaba thikna sha ki samla pule ha kano ka Hall ba ki dei ban leit thoh ïa ka eksamin. Ka jingpynslem ban pynlong ïa ka eksamin ha ka sobjek English na ka dw ka jingbym treikam jong ka Biometric System, ka la pynlong ïa ki samla pule ban ieng shah slap bad thyngngian para ma ki, kaba lam shaduh u pud ba ki don ki samla kiba la ïapler bad kiba la donkam ban ïoh jingsumar kyrkieh,” la pyntip ka seng ïa ka jingjia ha ka sngi Balang ha ka dorkhas ba la soi da u Chairman jong ka Education Cell ka KSU u samla Pynkmenlang Sanmiet bad u Secretary u samla Shelkitbok Kharbani.
“Ka long kaba sngewsih ba ka por thoh eksamin kaba la buh ha ka por 3:00 baje noh sngi hynrei ki samla pule ki dang ïoh ban rung sha ka jaka thoh eksamin haduh ka por 5.15 baje janmiet tad ynda ka NEHU ka la ïoh ktien na ka NTA ban pynlong ïa ka eksamin khlem da pynlong shuh ïa ka Biometric Registration,” la pyntip shuh shuh ka seng.
“Kine ki sakhi ki pynpaw shynna ka jingbym pynkhreh da ka Sorkar Jylla bad ka skulbah ban pynlong kat ïa kane ka eksamin, khamtam ha kaba ïadei bad ka jingtehlakam ïa ka jingïalum lymbung,” la ong ka seng.
Ka Seng ka la kynthoh ruh ba ka jingpynslem ïa ka por ban pynsdang ïa ka eksamin, da kaba pynieng ïa ki samla pule ha u lapbah lapsan, ka donkam ban pynbeit mardor ïa ki rukom treikam kiba janai.
“Namarkata, ka seng ka kyntu ba phin shimkhia mardor ïa kine ki jingjia ba kin dei shuh ban dang jia ha ki por ki ban sa wan. Kine ki kynthup naduh kaba pynbiang ïa ki tiar ki tar, kum ki jingbthah, ka jingpynbiang ïa ki jaka thoh eksamin, ka jingpyntreikam pura ïa ka Biometric Systems, bad ban pynïaid beit ïa ka eksamin ha ka rukom kaba dei,” la ong ka seng bad bynrap, “dei ban pynbiang ïa ki bor pahara ban peit ïa ka jingïalum briew bad ban pynthikna ïa ka jingshngaiñ jong ki nongïaleh eksamin.”
