Jowai, Jymmang, 16: Ka ïingbishar jong u Sessions Judge ka West Jaiñtia Hills District hadien ka jingbishar kaba khatduh ïa ka mukotduma halor ka jingshah pynïap u Bah Trebor Hinge ha ka shnong Nangbah, ka la rai pynrem ïa u Ram Dhar da kaba set along shi rta jingim.
Katkum ka khubor ba la phah da u Superintendent of Police ka West Jaiñtia Hills u la ïathuh ba kane ka la jia naduh ka 11.02.2015 ha kaba la register case pyrshah ïa u Ram Dhar halor ka jingkynnoh donkti ban pynïap dusmon ïa u Bah Trebor Hinge. La register case ha Jowai Police Station hapoh ka Section 302 IPC ba la shimti da u SI S. Pariat.
Ha kane ka jingrai pynrem ïa u Ram Dhar, ka ïingbishar ka la hukum ba un siew ïa ka kuna kaba T. 5000 hajar bad la hukum ban siew bai lutksan T. 3 lak sha ki bahaïing jong uba la khladnoh.
