Shillong, Lber, 13: U Chief Conservator jong ka tnat Forest u N. Luikham uba dei ruh u ophisar Indian Forest Services (IFS) u la pynkut noh ïa la ka jong ka jingim ha u tyllai phasi ha ka ingsah ka jong u kaba don hajan ka Lady Keane College, Shillong.
U Luikham u dei uba la don kumba 50 snem ka rta bad u dei u ophisar IFS jong ka Batch 2003.
Katkum u kyrwoh ba la pyntip da u Superintendent of Police jong ka East Khasi Hills District u Rituraj Ravi u la ong ba u Luikham u la phasi ïalade ha ka por 7:30 baje mynstep.
Tang shu ïoh jingtip halor kane, ki Pulit ki la leit ban shimti noh ïa ka met jong u bad ban pynkit sha Shillong Civil Hospital na ka bynta ban leh ïa ka Post Mortem.
Ha ka por janmiet, ki bahaing hasem ryngkat ka jingsynran lang jong ki nongtrei ka tnat Forest ki la leit ban shimti noh ïa ka met ba dang sah jong u Luikham na Civil Hospital, Shillong bad ban pynkit biang sha ka quarter kaba u ju sah shwa ban pynkit noh ïa ka met sha ka shnong Ukhrul, Manipur na ka bynta ka jinglehniam kaba khatduh.
Haduh mynta ym pat lah satia ban tip ïa ka daw tynrai halor ka jingpynkut noh jong une u ophisar ïa la ka jong ka jingim.
Tang shu ïoh jingtip halor kane, u Myntri Rangbah ka Jylla Conrad Kongkal Sangma ryngkat ka jingsynran lang jong u Chief Secretary ka Jylla u Bah Donald P. Wahlang bad ki ophisar jong ki tnat treikam bapher bapher ka Sorkar Jylla kynthup ruh ki nongtrei jong ka tnat Forest ha ka por janmiet ki la leit sngewlem bad pyntngen ïa ki bahaing hasem halor ka jingkhladnoh kyndit jong u Luikham.
Na ka liang jong u Myntri Rangbah haba kren ha kane ka jingïalang sngewlem u la pynpaw ïa ka jingsngewsih bad ong ruh ba ka jingkhladnoh jong u Luikham ka long ka jingduh kaba khraw ïa ka Sorkar Meghalaya khamtam ïa ka tnat Forest bad kumjuh ruh ïa ki bahaing hasem bad ki paralok kiba ïajan eh bad u.
