Shillong, Nailur, 17: Ka Special Investigation Team (SIT) ba la khlieh da u Superintendent of Police (City) u Bah Herbert Khorkngor kaba la pynlong ïa ka jingtohkit kaba bniah halor ka jingïap jong i heprit Insaphira Lyngdoh Mawnai, 4 snem ka rta ha Nongrah Nonglumbrei, Shillong ka la lap ba dei u khynnah rit uba dang 13 snem ka rta ha kaba la kynnoh ba u dei uba donkti halor kane ka jingjia.
U Superintendent of Police ka East Khasi Hills District u Bah Vivek Syiem ha ka jingïakren bad ki lad pathai khubor ha ka sngi Balang u la ïathuh ba une u khynnah rit u dei ruh uba sah marjan bad uba ju leit kai bha ha ingsah jong i heprit Insaphira manla ka sngi.
I heprit Insaphira Lyngdoh Mawnai i la jah na phyllaw ïing ha ka step sngi u Blei bad la lap ïa ka met jong i ha ka Lah Sngi u Blei na kawei ka ïing ba dang shna kaba jngai tang kumba 100 mitar tam eiei najan ka ïingsah jong i ha kaba i la thiah ïap ha ka um ba lang bad ba la ban da u maw na ka met, kaba la pynlong ïa ki bahaïing hasem ban suba ba i la shah pynïap.
U SP u la ïathuh ba ka jingtohkit, u khynnah uba dang 13 snem la phla ba dei na ka jingbtuid kaba la lam sha ka jingngam jyllop jong i heprit Insaphira ha ka um kaba lang hapoh ka ing ba dang shna.
Kane ka jinglap ki Pulit ka la jia tang hadien lai sngi ba la pynlong ïa ka jingtohkit kaba bniah da ka Special Investigation Team (SIT), kaba la tohkit ïa ki nongsakhi bad na ka kaiphod Forensic, kynthup ruh ïa ki dak kjat jong u khynnah uba iuh ha ka ïing ba dang shna.
Katkum ka jingong jong u Bah Syiem, u khynnah u la phah ba u la ïalam ïa i heprit Insaphira ban ïaid kai bad kynthih najrong ka kynroh kaba don hajan ka ïing ba dang shna ha ka 14 tarik mynta u bnai. U khynnah u la phla ha ki Pulit ba u la sait ruh ïa ki kjat ba la khah da ka ktieh ha ka um ba lang hapoh ka ïing hadien ba u la btuit bad da ka jingbakla u la kum patan lang ïa i heprit Insaphira kaba la pynlong ïa i ban ur lang bad ban ïapler.
Ka kaiphod post-mortem ka la pynthikna ba ka jingïap jong i heprit Insaphira ka dei ka jingngam jyllop, ha kaba kam don satia kano kano ka jingleh be-ijot, ka jingshah tuh ki sohskhor ksiar lane ka jingmong ha ka met, la ong u Bah Syiem.
Kane ka jingjia ka la pynkyndit lut ïa ka shnong ka thaw baroh kawei, khamtam haba u khynnah uba la 13 snem u la leit lang ha ka por ba la wad shnong ïa i heprit Insaphira.
Ha kaba nyngkong u la pynthame ïa ki nongtohkit da kaba kam ba u la ïohi ïa ki briew kiba kah ïa ka durkhmat bad kawei ka kali Scorpio kaba iong ha ka por ba i heprit Insaphira i la jah rngai.
Ïa u khynnah uba la 13 snem la rah noh da ki Pulit sha Juvenile Home bad un shah tohkit hapoh ki kyndon jong ka Juvenile Justice Board.
U SP u la ïathuh ruh ba i heprit Insaphira bad u khynnah 13 snem ki dang shu dep bam ïa u biskit shwa ban jia ka jingjia ba sngewsih bad ong ruh ba la ïoh kurup ïa ka song plastik biskit na ka ïing ba dang shna.
“Ka kaiphod post mortem ka pynpaw ïa kata ba wat u biskit uba i heprit Insaphira i dang dep bam um u dang lang ha kpoh bad ki snier kim pat lah ban tylliat,” la ong u SP.
U la ïathuh ba ka jingtohkit haduh mynta ka dang ïaid shakhmat namarba ka SIT ka la ïoh bor ban pyndep ïa ka jingtohkit na ka bynta 90 snem bad ban pynshisha ïa baroh ki jingphla jong u Khynnah 13 snem.
“Ngin sa nang pynlong shuh shuh ïa ka jingtohkit na baroh ki liang, ka jingtohkit kam pat kut,” la ïathuh u SP.
Haba kylli, u SP u la ong ba ka jingbym lap ïa ka met ha ka jingwad shnong ka dei namarba ki paidbah bad ki Pulit kim shym la poi pyrkhat ba ka met kan don ha ka ïing ba dang shna kaba dang lait rynghang bym pat ker kynroh eiei.
