Shillong, Nailur, 25: Khatar ngut ki nongdih drok bad kynthup ruh ïa uwei u snar khaii drok ha ka sngi Balang ki la shah bat ha ki dkhot jong ka Hynñiewtrep Youths Council (HYC) ha ka jingkhynra ïa ki nongdih drok ha ka thaiñ Polo, Lad Lawmali bad najan Lum Jingshai.
Ïa kine ki khatar ngut ki nongdih drug, ka HYC ba la lamkhmat da u Secretary u Bah Isaac Basaïawmoit la ïoh bat na ka thaiñ Polo, Lad Lawmali bad kumjuh ruh najan Lum Jingshai.
Ha ka jingtohkit jong dkhot ka HYC ïa uwei na ki nongkhaii drok, u la ïathuh ba u don uwei u briew uba dang shu mih na along uba phah die ha u hynrei u shu ai bai sngi ïa u.
Ha kane ka jingkhynra jong ka HYC ïa ki nongdih drok, la synran lang da ki nongïalam shnong jong ka Dorbar Shnong Lawmali.
Katkum ka jingïathuh jong ki nongkitkam shnong, kine ki nongdih drok bad ki nongkhaii drok kim dei satia ki nongshong shnong hapoh u pud u sam jong ka shnong Lawmali hynrei ki dei kiba nabar jong ka shnong.
Katba ki dkhot jong ka HYC ki dang bat ïa ki nongdih drok ki la don katto katne ngut kiwei pat ki nongdih drok kiba la telephone ïa u nongkhaii drok ïa uba la ju khot sin kum u kliaw.
Ha ka jingïakren lyngba ka mobile phone, la ïohsngew ba ki nongdih drok ki la pan thied ïa u drok ha kaba u Kliaw u la shu jubab ïa ki nongthied da ka jingbym banse hakhmat ki dkhot ka HYC bad ki nongkitkam shnong jong ka Dorbar Shnong Lawmali.
