Shillong, Rymphang, 23: U Myntri ka Sorkar Pdeng uba peit bad khmih ïa ka Tnat Ports, Shipping & Waterways bad Ayush, Sarbananda Sonowal ha ka sngi Thohdieng u la plie paidbah ïa ki projek bapher bapher ban kyntiew ïa ka bor treikam ha North Eastern Institute of Ayurveda and Homoeopathy (NEIAH) ha phyllaw jong ka, kaba don ha Mawdiangdiang ha ka nongbah Shillong.
Utei u Myntri ka Sorkar Pdeng uba khmih ruh ïa ka tnat Ayush u la plie ruh ïa ka Guest House bad buh mawnongrim na ka bynta ka Administrative Building, Pharmacy Building, kumjuh ruh ka kynroh bad ka surok kynthup ki khyrdop ban rung bad mih ha katei ka prokram.
Haba ïadei bad kane haba ai jingkren ha ka jingïalang, u Myntri Sorkar Pdeng, Sarbananda Sonowal u la ong ba lyngba ka jingkyntiew ïa ka bor treikam ha NEIAH, kin don ka lad kaba kyrpang ban ïoh jinghikai, ïatreilang bad kyntiew ïa ki bor haba ïaleh ban wanrah ka jingpynshisha ïa ki rukom ai jingsumar tynrai lyngba ka jingsakhi jong ka jingstad saïan.
“Ka long ka khyllipmat jong ka jingsngewthuh kaba khraw ba ka institute ka la dep ai jinghikai pyntbit jan shi hajar ngut ki riew shemphang ha ka Ayurveda bad Homoeopathy. Kane ka la kyntiew bha ïa ka rukom ai jingsumar ha ka thaiñ, khamtam ha Meghalaya, haba ngi ïaid shaphrang ban pynurlong ïa ka thong jong u Myntri Rangbah duh jong ngi, Narendra Modi na ka bynta ka Swastha Bharat,” u la ong.
U la ong ba kane ka kynhun ba thymmai jong ki nongai jingsumar, kiba don ka atiar jong ka jingai jingsumar Ayush kin ïarap ïa ki briew ban ïoh ïa ki jingmyntoi.
U la ong ruh ba ki don ïa ki jingïa Ki janbha bad ki rukom ai jingsumar tynrai ba hyndai kiba da ki hajar snem, hynrei mynta lyngba ki jingai jingsumar ba la pynshisha da ka saïan ban sumar ïa bun ki jingpang. Ka jingkoit ha India, ka jingïoh jingkoit na India ka long ka jingthmu jong ka jingkhie im biang ka Ayush.
La ong ba ka Guest House kaba la plie thymmai ka don ha ka jaka kaba 1780.56 SqM ka ban ai jaka sah bad kaba don ki lad ban pynlong jingïalang. Ïa kane ka jingtei kaba la pyndep kadei kaba ïahab bad ka mariang bad ka don lut baroh ki jingdonkam katkum ka juk mynta.
Ka Administrative Building ban dang shna jong ka NEIAH, ha ka jingheh kaba 3160 SqM kan don kawei ka building (G+3) ryngkat artylli ki mala kaba sha trai duh, kynthup kawei ka hall. Ka jinglut ba la mang na ka bynta kane ka jingtei ka long T. 27.30 klur. Ïa ka building jong ka pharmacy yn shna ha ka jingbei tyngka kaba T. 15.33 klur na ka bynta ka G+3 building kaba 1833 SqM. Ïa ka kynroh bad ka surok kaba la pynshai sharak ba kynthup ka khyrdop ban rung bad mih la shna ha ka jinglut kaba T. 12.72 klur.
Na ka liang u Sarbananda Sonowal u la ong, “Ka sorkar ba ïalam u Narendra Modi ka thmu ban ïarap bad pynkupbor ïa ki rukom sumar tynrai jong ngi ba kin saphriang palat ïa ka imlang sahlang bad u pud u sam bad ïarap ïa ki briew ban im ka jingim kaba koit ba khiah bad wanrah ïa ki jingpyn ïaid ïew na ka bynta ka thaiñ.”
Katba ki jingdon jingem ki long kiba kongsan na ka bynta ki jingseisoh ba kham biang ha ka jingwad bniah bad ka jingkyntiew ïa ki kam, kan jingkyntiew ïa ka bor treikam ha NEIAH, kan pynkhlaiñ ïa ka jingkhie im biang jong ka rukom ai jingsumar tynrai hapoh ka jingïalam jong u Myntri Rangbah duh, Narendra Modi.
“Ka sorkar ka la kut jingmut ban kyntiew ïa ka bor treikam ha NEIAH khnang ba kan long ka jaka kaba don ïa ki briew kiba la tbit bha ha ka kam jong ka Ayush ha ka ri. Ha ka shi snem ba la leit, ka sorkar Modi ka la bei tyngka palat T. 145 klur ban kyntiew ïa ka bor treikam ha NEIAH. Ka jingmang tyngka na ka bynta ka projek ban kyntiew ïa ka bor treikam ha NEIAH kaba long T. 217. 02 klur,” ong u Myntri.
U Myntri Ayush u Sarbananda Sonowal u la pynbna ruh ba ki jingshakri OPD kin sdang ha Smit, East Khasi Hills district ka ban long ka jingmyntoi ïa 40,000 hajar ngut ki briew kiba sah ha 20 tylli ki shnong. U Myntri u la pyntip ruh ba ka NEIAH ka la sdang ïa ka Swarnabindu Prashan Sanskar (Ayurvedic Immunno Modulation in Children) ha ka Ayurveda Hospital jong ka.
Lyngba kane ka prokram, ka sorkar ka ïarap ïa ki nongpang lyngba ki lad jingsumar Ayurvedic ban sumar ïa ka jingpang Iron Deficiency Anemia (IDA) ha ki longkmie riewlum kiba hapdeng 18 bad 45 snem ka rta ha Mawpat bad Mylliem Block jong ka East Khasi Hills district hapoh ka AYURSWASTHYA Yojana.
U la ong ba ka NEIAH ka la ïarap ïa ki nongpang lyngba ki lad jingsumar kum ka Panchakarma, Ksharasutra, Uttarabasti bad Yoga ban kyntiew ïa ka jingkoit jingkhiah jong ki.
“Katba nang bun ki samla pule ki la ïoh jinghikai pyntbit ha kine ki rukom jingsumar, ba kynthup ka specialised Panchakarma Technician programme, ngi khmih lynti ba ka rukom sumar Ayush kan nang paw shuh shuh, bad kan kham suk ban ïoh ïa ki jingmyntoi kaba ai ha ka koit ka khiah.
Ka India hapoh ka jingïalam ba tbit jong u Myntri Rangbah duh Narendra Modi ka la rah ïa ka jingsumar tynrai sha ka jingkhie im biang ha ka pyrthei. Ka Ayush kaba la ïoh bor biang ka la ïarap ban kyntiew ïa ka bor jong ki hajar snem ki rukom sumar tynrai haba ka bteng ban sdang ïa kane ka jingïaid lynti kumba long mynta,” u la ong.
U la ong ba kane ka long da kaba wanrah ïa ki dawai tynrai shakhmat hapoh jong ka da ka jingthmu ban tei ïa ki lad ai jingsumar ba la pynshisha da ka saïan ban kyntiew ïa ka jingim jong ki briew, ban don ka met kaba khlaiñ bad ki jingmut jingpyrkhat kiba kmen.
Ha kane ka prokram la donlang u Secretary jong ka Ayush, Vaidya Rajesh Kotecha; Vice Chancellor jong ka Northeast Hill University (NEHU), Prof PS Shukla; Joint Secretary, Tnat Ayush, BK Singh; lem bad u Director, NEIAH, Prof Neeta Maheskar.
