Shillong, Rymphang, 23: Ka Meghalaya Joint Action Committee (MJAC) ha ka sngi Thohdieng ka la ujor sha u Myntri Rangbah ka Sorkar Jylla u Conrad K. Sangma halor ka jingkynnoh ba ki bor pynïaid jong ki Karkhana kiba don hapoh u pud u sam jong ka East Jaiñtia Hills District ki khaïi beaiñ ïa u dewïong bad ïa u mawshun sha ki karkhana pynmih dewbilat kiba don ha East Jaiñtia Hills.
U Secretary General ka MJAC u Bah Enrico D. Pasi ha ka jingïakren bad ki lad pathai khubor ha nongbah Shillong u la kam ba ki don la kumno kumno haduh 800 tylli ki trok kit mawshun bad 130 tylli ki trok kit dewïong kiba ju rung sha ki Karkhana manla ka sngi kiba kit ïa ki marpohkhyndew sha ki karkhana pynmih dewbilat ha East Jaiñtia bad ki trok kiba ju kit palat pud haduh lai shah na kaba dei ban kit.
“Ngi dawa ïa ka Sorkar Jylla ba kan buh noh da ka Integrated Check Point khnang ban tehlakam ïa ka jinglait ei ka khajna namarba ka jingbym don jong ka Revenue Checkpoints ne ki Checkgates shwa ba ki trok kit dewiong bad ki trok kit mawshun kin rung sha ki karkhana pynmih dewbilat ha East Jaintia Hills,” u la ong.
“Kane ka jingkhaïi be-aiñ ïa ki marpohkhyndew kum u mawshun bad ïa u dewïong sha ki karkhana pynmih dewbilat ba don ha East Jaiñtia Hills ki la ïaid lait ban siew ïa ka khajna sha ka Sorkar Jylla namar ka jingbym don ki khyrdop talasi jong ka DMR, ka Jaiñtia Hills Autonomous District Council (JHADC) ban thew ïa ki mar ba la kit shapoh ki Karkhana,” ong u Bah Pasi.
U la kynthoh ruh nalor ba ki bor pynïaid jong ki Karkhana ki trei hi ïa ki kam ba ki trai jylla ki lah ban leh bad wat ka dor jong ka dewbilat ka tat bha haba ïanujor ïa ka bai dewbilat ha Khliehriat bad ha Assam.
“Ka jylla jong ngi ka dei kaba dang sahdien bha ha ka khaiï ka pateng, ka dei ruh ka jylla ka bym pat lah ban pyndap da lade ïalade, haba ka Sorkar kam shimkhia ban lum ïa ka khajna kan sa nang wanrah jingeh shuh shuh ïa ki paidbah. Ka jinglait ei jong ka khajna ka la nang pynduhnong bun shah ïa ka Sorkar nalor ba ka jylla ka la nang hiran ha ka ïoh ka kot naduh ba la khang ka jingtih bad shalan ïa u dewiong da ka National Green Tribunal (NGT,” la ong shuh shuh u Bah Pasi.
“Jin lada ka Sorkar ka la peitngor ban buh ïa ki khyrdop lum khajna ïa ki marpohkhyndew ha shwa ban pynrung sha ki Karkhana ka Sorkar kan jin da la ïohlum ïa ka khajna ban shna ïa ki surok, ki skul, ki hopsital bad kan long ruh ka jingkyrkhu ïa ki paidbah,” u la bynrap.
