Shillong, Risaw, 07: Hapdeng ka jingtwa khyndew bad ka jingshlei um kaba jur ha ka jylla Sikkim, 26 ngut ki samla pule na kane ka jylla Meghalaya ki la wan poi suk poi saiñ sha la ka jong ka jylla.
Kine ki 26 ngut ki samla ki dei kiba pule ha Himalayan Pharmacy Institute bad arngut ha Sikkim Manipal Institute of Technology ha Majitar, East Sikkim ki la wan poi tiap ha Inter State Bus Terminus, Mawiongrim, Shillong ha ka sngi saitjaiñ ha ka por kumba 6:45 baje janmiet hadien ka jingïaid lynti kaba 24 kynta eiei naduh ba ki la mih na Sikkim ha ka por 5 baje janmiet sngi thohdieng.
Kine ki samla pule ki la pynpaw ka jingsngewnguh shikatdei eh ïa ka Sorkar Jylla kaba la shimkhia ban pynpoi suk poi saiñ ïa ki sha la ing ha kum kane ka khep ba ki la mad ka jingeh bad ki jingsyier mynsiem ba ki don sha jngai na la iing.
Da ka jingshimkhia jong ka Sorkar Meghalaya, ki bor synshar jong ka jylla Sikkim ki la pynbiang san tylli ki kali ban pynkynriah ïa kine ki 26 ngut ki samla pule kiba sahkut ha Majitar, Sikkim tad haduh ban da pynpoi ha Siliguri bad na Siliguri la leit shaw da ka Bos kaba la pynpoi suk ïa ki haduh Shillong.
“Kumne ngi la poi suk sha la iing, ka long kaei kaei kaba kyrpang eh kaba ki (Sorkar Sikkim) la leh na ka bynta jong ngi. Ngi ainguh ïa ki bad ngi ngeit ba U Blei un ïai theh ki jingkyrkhu ïa ki bad ngin duwai ruh na ka bynta ki nongshong shnong jong ka jylla Sikkim kiba dang don hapdeng ka jingjynjar bad nga kyrpad ïa iwei pa iwei ba kin ai mynsiem bad ban kynmaw lem ïa ki ha ki jingduwai,” la ong ka samla Barihunshisha Lyngdoh, kawei na ki samla pule jong ka Himalayan Pharmacy Institute ha ka jingïakren bad ki lad pathai khubor ha ISBT.
Haba kylli, ka la ïathuh ba ka jingtwa khyndew na ka jingther jong u lapbah uba jur ka la sdang naduh ka 4 tarik mynta u bnai ha ka por kumba 2 baje mynstep eiei.
“Hajan ka Sikkim Manipal Institute of Technology ka jingtwa khyndew ka la sdang bad ha ka College jong ngi ruh ka la sdang hynrei kam pat da long than haduh katta katta kumba long sha kiwei kiwei ki jaka,” la bynrap kane ka samla pule.
“Ngim don Network, ngim don bording ngim don um bad ngi la shu pyntip sha u Myntri Rangbah badonburom jong ngi lyngba ki MLA. Da ka jingïarap jong ki, ngi la ïoh ban telephone ïa u Myntri Rangbah bad kumta hi mar mar ki la phah wan shaw ïa ngi,” ka la ong.
“Ngi syier palat, namar ban pyntip sha la iing ngim ïoh lad. Ngi la shu duwai namarba ngi don hapdeng ka jingsyier mynsiem,
Ka ïathuh ruh ba ka Sorkar ka la pynbiang naduh ki kali bad ka bam ka dih bad ka um katba ki dang don ha lynti ban wan phai sha Shillong.
Ka la ïathuh ba ka kali kaba kit ïa ki samla pule ka la hap ban ïaid na kawei pat ka surok kaba kham jrong namarba ka surok kaba kham lyngkot ka leit ka wan ka la shah pynjulor ha ka jingshlei um. “Hynrei ngi la ïaid da kaba suk, kam don satia kano kano ka jingjia katba ngi dang don ha lynti,” ka la bynrap.
Ka samla Sharon Papang ka la bynrap, “mar syn jia kumto, ngi la pyntip sha la ing hynrei ha kato ka por ka mobile network kam long, ka internet ruh kam long, ka bording ruh kam don. Ha kato hi ka khyllipmat ngim khlem ïoh ban pyntip ïa ki (bahaiing hasem) hynrei suki suki ngi la ïohlad ban pyntip pat sha la iing. Ki kmie ki kpa jong ngi, ki ai mynsiem beit ïa ngi, ki ong ynnai tieng.”
Da kaba pynpaw ïa ka jingsngewnguh ïa U Blei Uba la ri bad sumar ha kum kane ka khep ba ki don hapdeng ka jingsyier mynsiem ka samla Sharon Papang ka la ïathuh shuh shuh, “manla ka miet shwa ba ngin thiah ngi ju pynlong jingduwai, ngi ai mynsiem iwei ïa iwei watla kane ka jingjia ka la jia hynrei U Blei jong ngi U ïai don ryngkat beit bad ngi bad Um ju iehnoh hi ruh ïa ngi, wat lada ngi jngai na la ing ruh.”
“Ngi ki samla pule jong ka Himalayan Pharmacy Institute bad ka Sikkim Manipal Institute of Technology ruh ngi pynpaw ka jingsngewnguh bad ngi ai khublei haduh katta katta ïa ka Sorkar Jylla kaba la pynsuk ïa ngi naduh Sikkim ban pynbiang ïa ki kali naduh Sikkim haduh Siliguri bad naduh Siliguri shaduh shane sha Shillong. Mynmiet ruh ki la pynbiang ïa ka bam bad ngi ai khublei namarba ka jingïaid lynti jong ngi ka long kaba shngaiñ bad ngim don shuh kano kano ka jingsheptieng,” la pynpaw kane ka samla bad kiwei de ki samla pule ha ka jingïakren bad ki lad pathai khubor.
