Shillong, Jymmang, 20: Ki runar ki bym lah ban ithuh durkhmat ha ka miet shiteng synñia ka sngi u Blei ki la prong jubor hapoh ka jaka kynshew pisa jong ka State Bank of India, kaba don ha Umïam, ICAR, Ribhoi District.
Katkum ka jingtip ba la ïohlum, la ïathuh ba kane ka la jia hadien ba ki runar ki la shim kabu ïa ka jingdum jong ka miet bad ki la prong jubor hapoh kane ka Bank da kaba pynkdiah ïa ki nar jingkhang iit na ka jingkhang ba shadien jong ka Bank da ka jingthmu ban lute ïa ka pisa kaba don hapoh kane ka Bank.
Hynrei ha ka jingpyrshang ki nonglute kim shym la lah satia ban pynpait ïa ka duli (drawer) ba la thep ïa ka pisa.
La ïathuh ba la lap ïa kane ka jingjia ha ka step Lah Sngi u Blei ha ka por ba ki nongtrei jong ka SBI, Umïam Branch ki la poi sha ophis. Tang shu lap ïa kane ka jingjia, mar mar ki la pyntip noh sha ki Pulit jong ka Umïam Police Station na ka bynta ban pynlong ïa ka jingtohkit.
Tang hapoh khyndiat por la wan poi sa ki Pulit ka Crime Branch ban pynlong ïa ka jingtohkit kaba bniah halor kane ka jingjia.
