Shillong, Jymmang, 20: Ka Kong Idashisha Nongrang, ka Ophisar IPS ka la shimti kum ka Director General of Police (DGP) ba thymmai jong ka Jylla Meghalaya ha ka Lah Sngi u Blei.
Ka Kong Nongrang kaba dei na ka Batch 1992 IPS Officer ka dei ka kynthei Khasi banyngkong eh bad ka Ophisar IPS ban shimti ïa kane ka kyrdan ha ka tnat Pulit jong ka Jylla.
Tang shu poi ha phyllaw jong ka Police Headquarter, Shillong ha ka step Lah Sngi u Blei ka tnat Pulit ka la pdiang burom ïa ka Kong Idashisha Nongrang bad hadien kane ka Kong Nongrang ka la shong jingïalang bad ki Ophisar jong ka tnat Pulit ban ïakren ha kaba ïadei bad ka jingpyntyllun ïa ki kam nangne shakhmat hapoh ka tnat.
Ka Kong Nongrang kan shakri ha ka tnat Pulit haduh ka 19 tarik, Jymmang, 2026.
Dang shen ka Union Public Service Commission (UPSC) ka la mynjur ïa ka kyrteng jong ka Kong Nongrang, nalor u Ram Prasad Meena, ADG ka Border Security Force (BSF), u Deepak Kumar, ADG ka Central Reserve Police Force (CRPF) na ka bynta ka shuki DGP.
Kum ka Ophisar IPS ka la shakri ha kylleng ki bynta bapher bapher ka jylla, ha ka Intelligence Bureau (IB), nangta, kum ka Director General (DG) jong ka tnat Civil Defence & Home Guard, Meghalaya shwa ba kan shah thung kum ka DGP hadien ba ka samoi shakri jong u DGP barim u Lajja Ram Bishnoi ka la kut ha ka 19 tarik mynta u bnai.
