Shillong, Risaw, 21: Ki paidbah bad ki nongkitkam jong ka shnong Umsning bad Pashang, Mawkynrew C&RD Block ryngkat ka jingsynran lang jong ki nongïalam ka Federation of Khasi Jaiñtia and Ggaro People (FKJGP), Mawkynrew Circle ha ka Lah Sngi u Blei ki la leit ban pynsngew sha ki bor badei peit jong ka Meghalaya Energy Corporation Limited (MeECL) halor ka jingma kaba ap ïa ki paidbah namar ka jingsarang jong u nar post electrict bad ka jingpynpur ïa u sainar ilektrik nalor ka tnum iing jong ki briew ha ka shnong Pashang bad Umsning.
Ha ka jingïakren bad ki lad pathai khubor, u Secretary ka shnong Pashang u Bah P. Nongrum u la ong ba ka jingpynsngew ha u Excutive engineer jong ka MeECL ka long ban pynkynriah ïa u sainar ilektrik bad ban siej bujli ïa u nar post ilektrik uba la bam sarang sa ban ban shu khyllem ha kano kano ka por.
Nalor kine, kum ka shnong ki la pynsngew ruh halor ka jingthud ka bording ha kaba ki paidbah ki la hap ban shongdum mynta la san bnai kynthih.
Katkum ka jingïathuh jong ki nongkitkam shnong, ki don bun tylli ki nar post ilektrik kiba la bam sarang bad kiba la donkam ban bujli thymmai da kiba bha khnang ban ym buh jingma ïa ka jingim jong ki paidbah nongshong shnong.
U Bah Nongrum u la ïathuh ba kane ka jingmih shakhmat jong ki nongïalam shnong bad ki paidbah da ka jingïarap jong ka FKJGP ka long wat hadien ba ki ladep ban pyntip ïa kane sha u MLA ka Mawkynrew Constituency u Bah Banteidor Lyngdoh hynrei ka shu kut tang ha ki jingkular bad ka jingïai ap.
Ki nongïalam shnong ki la ïathuh ba ka jinglip jong ka bording ka dei na ka daw ka jingthud jong u Transformer wat hadien ba la pyndait da uba thymmai naduh u bnai Jymmang mynta u snem.
“Hynrei tang ha u bnai Nailar, u Transformer u la sniew noh bad la buh bujli da uba thymmai uba treikam tang shi sngi ar ngi bad sniew biang. Hynrei ynda la leit ïakynduh ïa u MLA (ban pynsngew ïa ka jingeh) hynrei u ong ap shi ap naduh u bnai Nailar haduh mynta,” ki la ong.
Haba kylli, ki nongïalam shnong ki la ïathuh ba u Executive Engineer u la kular ban sa phah buh bujli noh da u Transformer uba thymmai sa tang hapoh shi sngi ar sngi.
Ïa ki nongkitkam shnong bad ïa ki dkhot ka FKJGP la synran lang da ki nongïalam jong ka Seng Longkmie shnong Umsning.
