Shillong, Lber 22: Ki Pulit ka South Garo Hills, ki la ïoh ban pyllait im ïa u Mechanic jong kawei ka kompeni shna surok, uba la shah rahbor ha ki runar kiba la aipor lai sngi ïa ka kompeni ban siew ïa ka pisa ba T.50 lak.
Ïa une u mechanic la ïoh pyllait napdeng jong kawei ka khlaw. Une u mechanic u kyrteng u Akhilesh Chauhan ba na Lucknow, Uttar Pradesh.
Une u mechanic ula shah rahbor na ka jaka shna jingkieng kaba don hajan ka shnong Karukom, Siju, South Garo Hills, myn ha ka miet 19 tarik mynta u bnai.
Tang hadien katto katne kynta ba la rahbor, ki runar ki la telephone ïa ki bahaïing u Chauhan ha Uttar Pradesh bad dawa pisa 50 lak ban pyllait ïa u bad aipor ruh lai sngi ba kin aiti ïa ka pisa, k a ban kut mynta ka sngi.
Ki Pulit ki la pynlong ïa ka jingkhynra ha ka miet sngi Palei bad ki la lap ïa ka jaka rieh jong kine ki nongrahbor kaba don hapdeng jong ka khlaw, kaba jngai kumba 10 kilomitar na ka jaka ba rahbor.
Ha kane ka jingkhynra, ki Pulit ki la ïoh kem arngut ki nongrahbor katba arngut pat ki la lait phet. Kine ki runar ki dei kiba ju don jingïadei bad ki kynhun kaikhlaw. Kiba shah kem ki kyrteng u Wilban M Sangma na Durabanda Songgital, South Garo Hills bad u Withmil S Marak na Upper Dosogre, South Garo Hills.
Ki Pulit ki la register case pyrshah ïa kine ki arngut ha Siju Police Station.
