Shillong, Lber, 22: Ka khubor ba la saphriang ha Social Media ka la iathuh ba ki don kumba 50 ngut ki briew ba la kah durkhmat bha ialade bad kiba rah da ki tiar ki tar pynmynsaw ki la rung ha skulbah North Eastern Hill University (NEHU) ban thwet ia ki nongialam jong ka North Eastern Hills University Students Association (NEHUSU) kiba dei ruh ki nongialam jong ka Hynñiewtrep Youths Council (HYC) NEHU Unit, kata, u Banpynbiang Riang bad u Mandor Diengdoh hadien ba la kynnoh ba kine ki arngut ki nongïalam jong ka HYC ki la khang ia ka prokram jong ka Rashtriya Swayamsevak Sangh (RSS) ha ka 20 tarik mynta u bnai kaba la thmu ban pynlong prokram ha skulbah NEHU.
U nonglum khubor tang shu ioh jingtip halor kane ka jingsaphriang ka jingthoh ha rynsan Social Media u la leit sha NEHU bad sakhi ba ki Pulit SOT bad ki Pulit ka Mawkynroh Outpost ki la pahara ha phyllaw ka skulbah NEHU.
Watla ki Pulit kim shym la lap satia ia ki briew kiba kah durkhmat bad rah ia ki tiar pynmynsaw hynrei ki la pynkhlaiñ ia ka jingpahara ban tem ia kino kino ki jingjia ba sngewsih kiba lah ban jia ha kano kano ka por bym lah ban poi pyrkhat.
U General Secretary ka NEHUSU u Banpynbiang Riang haba iakren bad u nongthoh khubor u la ong, “ki don kiba kam ialade na ka sengAkhil Bharatiya Vidyarthi Parishad (ABVP) kawei ka kynthei bad arngut ki shynrang. Nga la leit lang bad ki paradkhot ka seng na Mawlai ban iakynduh ia ki bad ka rukom kren ka long beit balei ba ngi pynsangeh ia ka prokram jong ki RSS. Nga la batai beit ia la ka jong ka nongrim balei ba la pynsangeh. Ka rukom kren ka long kaba khor bha bad ka bym sngewtynnat.”
“Ka kynthei ka dei ka Khasi bad uwei u shynrang u dei u Khasi bad uwei u Garo,” la iathuh u samla Riang.
“Ha ka jingiakren ki pynksan beit ia ka nia lajong bad bad nga ruh nga la kren beit halor ka nongrim lajong,” u la ong.
U la iathuh hadien ba u la leit phai noh ban leit prokram hadien shikynta ka jinglong jingman ka skulbah NEHU ka la ipher bha. “Hadien shikynta ka jinglong jingman ha NEHU ka ipher bha. Ki briew ki la wan naduh mynsngi ban peit thuh bha ia nga bad ka rukom wan jong ki ka long kaba i shankhmat bha bad ngam tip la ki dei ne kim dei ki khynnah pule ha NEHU,” u la ong.
“Ynda la dep jingialang nga wan phai noh bad u Mandor bad u la ioh jingtip ba ki don ki briew ba kah durkhmat ki don ha NEHU. Shisha (ngi lap) hajan Petrol Pump (NEHU) ki don kumba 50 ngut ne 60 ngut ki briew ba la kah durkhmat ki bat ia ki tiar. Ban sangeh shiteng lynti ym long shuh u Man u pynher ia ka kali. Ynda la leit shaw ia u paralok sha Hostel ki don ki briew kumba 3-4 ngut ki shu wan peit bad ki iaid noh sharum. Ynda la wan buh ia u paralok ngi la leit peit biang hynrei ki briew kim don shuh ki la iaphiah kynhun la ka jong,” la ong u Samla Riang.
“Nga la ioh ia ka khubor na ki Security ba ki (briew bym lah ithuh) la kawang bilor ia ka Guest House ICCR bad ki don ki khynnah kiba ap ia ka Hostel 19 bad 20 ha ka por kumba 8:00 baje shaneng,” la ong u samla Riang.
Haba kylli, “ka don ka jingthmu ban pynlong ia ka prokram bad ynda ngi la wad bniah bha ngi lap ba ki nongshah khot sngewbha ki dei ki nongialam ba hakhlieh ka RSS. Kane ka prokram ka dei halor ka Indian Modern Literacy Language hynrei ynda la bishar bha ka dei ka Education Cell jong ka RSS.”
“Ki khlem ioh jingbit na ka NEHUSU bad ki pynlong ia ka prokram ha ka por ba ngi don ia ka Cultural Night jong ka NEHUSU. Na kata ka daw ngim shah ba ka iatakhuh bad ka prokram jong ngi,” u la ong shuh shuh.
“Ngi don ia ki sakhi ba ka don ka jingiadei bad ka RSS na kata ka daw ngim kwah ba kan don kum kata. Nga ka seng ngin sa shimkhia ia kane ka kam bad ka HYC ruh kan sa shimkhia,” la bynrap u samla Riang.
U la iathuh ruh ba u la pyntip ia ki Pulit tangba ki la poi kham slem sha NEHU bad nalor kata wat ki Security bad ki samla pule ki iohi ia ki briew kiba kah durkhmat kiba ialum lymbung shi jaka ha NEHU.
