Shillong, Naiwieng, 02: Ka Khasi Indigeneous Foundation (KIF) ha ka sngi Saitjaiñ ka la pynbna ïa ka khusnam da ka song pisa kaba T. 2 lak na ka bynta ki nongïashim bynta kiba ïohrah ïa ka nam lahduh ha ka rynsan ïakob pyni sap kaba la tip kum ka Khasi Jaiñtia Got Talent 2024, Season-1.
Kane ka dei ka sien kaba nyngkong eh ba ka ka Khasi Indigeneous Foundation kan pynlong ïa kane ka rynsan ïakob ha ka 11 tarik, Nohprah, 2024 ha ka shnong Wahïajer, West Jaiñtia Hills District.
Nalor ka khusnam lahduh, ka Khasi Indigeneous Foundation ka la pynbna ruh ban ai khusnam da ka song pisa kaba kot T. 1 lak ïa kiba jop ha ka kyrdan kaba ar bad T. 50 hajar ïa kiba jop ha ka kyrdan kaba lai.
Ha kane ka sngi, u Editor jong ka website SP News Agency u Bah Starfing Pdahkasiej uba la long kum u Kongsan u la pyllait paidbah ïa ka Trophy ha Shillong Press Club.
Haba kren kum u kongsan u Bah Pdahkasiej u la ong ba kaba kongsan eh ka dei ka jingïashim bynta ha kano kano ka jingïakob.
U la ban jur ba ha kum kine ki jingïakop ban ïoh ïa ki nongjop kiba don shisha ïa ka sap kaba ki don kam da dei eh ban don kata ka jingdie ïa ki tiket, lada don ka jingdie tiket kiba don ïa ka sap kin ym lah shuh ban jop namarba la jop da kiba lah ban die shibun ki tiket, kane kam dei shuh ka sap kaba ki don.
U la ai khubblei ïa baroh ki nongwan ïashim bynta kiba don haduh 30 ngut. Na kine ki 30 ngut, kiba la poi mynta sha ka jingïakob phainal ki don 10 ngut.
“Nga ai ka jingkitbok kitrwiang ïa baroh ki nongïashim bynta ba kin trei shitom ban ïoh rah ïa ka nam lahduh,” ong u Bah Pdahkasiej.
U Director jong ka Khasi Indigeneous Foundation (KIF) u Bah Niman Shadap u la ïathuh ba ka Foundation ka la buh thong ruh ban pynshna da ka iing ïa kino kino ki nongïashim bynta kiba ïohrah haduh lai sien kynthih ïa ka namjop ha kane ka rynsan ïakob pyni sap.
U la ong ruh ba ka jingpyllait paidbah ïa kane ka Trophy ka long ban pynthikna ba ka jingïakob kan long haba shit haba shai bad ba kam don kano kano ka jingleh thok leh shukor.
“Ngi khot bad wer ruh ïa ki paidbah ban wan sakhi lang ha ka phainal jong kane ka rynsan ïakob ban long ha ka shnong Wahïajer,” la wer u Bah Shadap.
