Shillong, Nailar, 22: Ka Meghalaya Engergy Corporation Limited (MeECL) ha ka step sngi Palei ka la pyllait ïa ka um na pung Umïam, hadien ba ka jingdap jong ka um kaba don ha kane ka pung ka la kiew 3209.68 phut haduh ka 13 tarik, Nailar, 2024.
Ka jingpyllait um jong ka MeECL ka la long tang hadien shi sngi ba u Deputy Commissioner jong ka Ribhoi District uba dei ruh u Chairman jong ka Distirct Disaster Management Authority (DDMA) u la pyntip ba ïa ka um na kane ka pung yn hap ban pyllait noh ha kano kano ka por lada jia ba ka jingther slap ka dang bteng ha kine ki sngi ki ban dang wan.
U Deputy Commissioner u la maham ruh ïa ki paidbah kiba shong basah sha rum ka pung Umïam ba kin long kiba phikir bad la bthah ruh ba kin ym leit tur sha wah ne sha wah duid khnang ban kiar na kino kino ki jingjia kiba sngewsih.
