Shillong, Naitung, 12: Ki bor synshar jong ka East Jaintia Hills kiba la pyntreikam ia ka hukum jong ka Iingbishar Meghalaya High Court, ha ka 12 tarik, Naitung, 2023 ki la pynbthei naphang ia ki Coke Factory ba la shna beain ha East Jaintia Hills District.
Nalor kaba pynbthei ha ban da lko hi phom ia ki Atoskhana, ki bor synshar district ki la pynpra ruh wat ia ki pajwa sain dewiong khnang ba kiba donkti ban pynieng beain ia kine ki karkhana sain dewiong kin ym iohlad shuh ban shna thymmai da kiwei pat.
Kane ka jingpynbthei ia ki karkhana sain dewiong kan dang bteng haduh ka 20 tarik, Naitung, 2023.
Ha ka sngi baar mynta ka taiew, u Joint Secretary jong ka tnat Forest and Environment ka Sorkar Jylla u la pyntip ba naduh u bnai Nohprah 2022 la leh tyngeh da kaba khang tala ia ki Coke Plant be-aiñ bad ka jingiai bteng ban pynpra naphang ia ki pajwa saiñ dewiong ka la iaid shakhmat khnang ban pynthikna ba kin ym lah shuh ban dang bteng ia ki jingtreikam sa shisien. Ka jingpynpra ia ki Coke Plant ka la bteng haduh u bnai Iaiong, 2023 kum shi bynta ban rat dyngkhong ia ki jingtei kiba be-aiñ.
Kum ban shu pynkynmaw, ki bor synshar jong ka West Khasi Hills District ki la pynbthei ia ki atoskhana bad pynpra ruh ia ki pajwa saiñ dewiong jong ki Coke Plant kiba don ha Shallang lyngba ka hukum jong ka Ingbishar Meghalaya High Court.
Lyngba ka jingbthah jong ka Sorkar bad da ka hukum jong ka Ingbishar High Court, la pynmih ia ki hukum ban kem naphang ia kiba donkti ha lyndet kine ki kam be-aiñ. Namarkata, ka jingpynpra ia ki atoskhana bad ia ki jingtei jong Coke Plant ba long be-aiñ ka la sdang naduh ka 8 tarik, Naitung, 2023. Haduh lai tylli ki atoskhana ladep ban pynbthei haduh ka 10 tarik, Naitung, 2023 bad la buh thong ban pyndep ia kane ka kam haduh ka 20 tarik, Naitung, 2023.
Bun ngut ki briew kiba donkti ban tei be-aiñ ia kine ki Coke Plant beaiñ la dep ithuh bad la iohkem.
