Shilllong, Naitung, 12: Ka Khun Hynniewtrep National Awakening Movement (KHNAM) ha ka sngi balang ka la dawa ïa ka Sorkar/Deputy Commissioner jong ka East Khasi Hills District ba kan weng noh mardor ia ka jingpynjari ia ka Section 144 CrPc ka ban sdang mynta ka sngi naduh ka por 10 baje mynmiet ba la mana tyngeh ia ki dukan, ki dukan die jingbam, ka jingtem pynheh sur jingrwai ha ki kali ha kylleng ka nongbah Shilllong.
“Ngi dawa jur ba ka Sorkar/DC kan weng noh ia kane ka hokum wut wut bad lada kim weng ngin pynlehrain ia u Myntri Rangbah/NPP/UPD/HSPDP/BJP (Sorkar Meghalaya) ha ka iing kashari,” ong u kyrwoh ba la phah da u Working President ka KHNAM u Bah Thomas Passah ha u kyrwoh la phah sha ki lad pathai khubor.
“Ka jingpynjari 144 CrPC da ka DC, East Khasi Hills District ha sor Shillong bad ban khanglad ia ki paidbah ban plie dukan hadien ka 10 baje mynmiet ka dei ka jingphla bad ka jingkubur jong ka sorkar jylla bad ka tnat pulit kam lah bad kam long kaba tbit ban tehlakam ia ki jinghuri hura bad ban wanrah ia ka shongsuk shongsain ha ka jylla. Kane ka jingpynbna jong ka DC ka pyrta jam ba ki shnat pulit kim long kiba tbit bad kim lah ban iada ia u paidbah. Ka sorkar ka kwah ba set ia ki paidbah ha ki iing ki jong ki, ban don ka shongsuk shongsain, lada ha kane ka rukom te wat ki lehnoh ruh ki lah hi ban wanrah ka shongsuk shongsain balei ngi donkam pulit?” la buh jingkylli ka KHNAM.
“Ka KHNAM ka pynrem jur ia kane ka lynti khawpud kaba ka shorkar ka la shim. Na ka daw ka jingkyrduh kam bad ban pyrshang ban ieng hala ki kjat bad ban kyrshan ban bsa ia la ka iing ki paidbah ki pyrshang ban trei miet da kaba plie dukam bam ban bsa ïa ka iing ka sem wat la ka dei ha khyndailad lane ha Laitumkhrah lane ha kiwei kiwei ki jaka. Mynta tang na ka daw kita kiba buaid miet bad ba pynklumar bad namar ba ka tnat Pulit kam lah ban teh lakam, ka long mo kaba shongnia ban shu phah khang dukan ia baroh bad ban pynbor ia ki ban thiah khlem bam,” la bynrap u kyrwoh.
“Kaba kham kongsan ka long balei la phah khang tang ia ki dukan jong ki rit ki ria ki dukan die marbam, balei khlem phah khang pat ia ki pup/disco ki jaka ia dih buaid? Hato lada bamja harud surok ha khyndailad lane Laitumkhrah shipliang ka pynbuaid mo?” la kynthoh ka KHNAM.
“Ka 144 Crpc bad ka jingpynbor ia ki dukan ban ym plie hadien ka 10 baje mynmiet ka dei ka jingpyrshang jong ka Sorkar ban khanglad ia ki paidbah ban kamai ban bsa bad ban pynim ia la ka iing ka sem bad kane ka jingkhanglad jong ka sorkar ka dei ka jingpynkhein ia ka hok jong ki paidbah kaba la aibor da ka Artikil 21 jong ka riti synshar ka ri India kaba kdew shai, “Article 21, which clearly states that right to livelihood is an integral part of the Right to life. If one’s Right to livelihood would be deprived, then it means that we are taking that person’s Right to life” ong shuh shuh u kyrwoh.
