Khliehriat, Naitung, 19: Ka Jaintia Students Union, Khliehriat Circle hapoh ka jianglam jong u President u samla Livingson Sama, u General Secretary u samla Ajoymenson Lyngdoh ryngkat ka jingdonlang jong u Vice President u samla Winson Salahe bad ki dkhot ka seng ha ka 19 tarik u Naitung, 2023 ki pyndam ia ka jingthoh Civil Hospital ha Khliehriat halor ka daw ba kane ka hospital kam pat don satia ia ki kor ki bor ban ai jingsumar kaba paka sha ki paidbah jong ka East Jaintia Hills District.
Shwa kane, ka seng ka la iakynduh ia u District Medical & Health Officer bad ia u Medical Officer ban pan jingpynshai halor ka jinglong jingman jong ka Hospital ha Khliehriat kaba dang shu dep kyntiew kyrdan sha ka Civil Hospital Khliehriat ha u snem 2022 hynrei phewse ka seng ka lap da la jong ki khmat ha ka jingleit jurip ba kane ka hospital ka dang sahdien wat hadien ba lah dep pynkiew kyrdan.
Ki dkhot jong ka seng kiba la dap da ka jingbitar ban iohi ba ka Sorkar Jylla ka la shu iehbeiñ ia ka East Jaintia Hills District wat hadien ba la ioh ia ka distrik bapura la 12 snem kynthih pynban ka Sorkar kam shym la shimkhia ban pynbiang ia ki jaka sumar.
Ki nongialam ka JSU ki la ong ruh ba ka Sorkar Jylla ka ioh kham bun ka khajna na ka East Jaintia Hills District hynrei haba phai sha ki kam pynroi kane ka district ka dei kaba sahdien ha kiba bun ki liang.
Halor kane, ka seng ka la shim ia ka rai ban pyndam shuwa ia ka kyrteng “Civil Hospital ” katba ka Sorkar kam pat lah ban pynbiang ia ki kor ki bor bad ia ki jingsumar kiba paka hapoh kane ka Hospital paitbah namar ha kiba bun ki khep ki paidbah nongshong shnong ki hap ban leit wad jingsumar sha Jowai Civil Hospital kat haduh ba ka la buh jingeh ia ki paidbah namarba ka lynti iaid ka long kaba jngai.
