Shillong, Jymmang, 03: Ka Sorkar Jylla ka la pyndam noh ïa ka hukum ‘be-aiñ ba la pynmih ha ka kyrdan Under Secretary ka tnat Social Welfare da kaba kam ba la ai jingbit lyngba ka jingai syrnot Scheduled Tribe (ST) sha ki nongaplai kiba shim ïa ka jait na u kpa lane na ka kmie lane ka jingshim jait na u tnga da ka kynthei kaba bym dei ka Khasi.
Ïa kane ka rai ba la pyndam noh ïa ka hukum ba la pynmih ha ka 21 tarik, Naitung, 2020 la pynbna da u Myntri ka tnat Social Welfare Bah Paul Lyngdoh ha ka sngi Thohdieng.
Ha ka jingïakren bad ki lad pathai khubor u Bah Paul Lyngdoh u la ïathuh ba ha ka 28 tarik Rymphang, mynta u snem u la lum ïa ka jingïalang bad u Executive Member bad ki ophisar jong ka Khasi Hills Autonomous District Council (KHADC) bad ïa ki nongmihkhmat na ka Hynñiewtrep Youth Council (HYC) ha kaba ïadei bad ka hukum ba la pynmih ha ka kyrdan Under Secretary ka tnat Social Welfare sha ki Deputy Commissioner jong ka East Khasi Hills bad West Khasi Hills ha u snem 2020.
Ka shithi ka ong, “ka Lineage Act, 1997 kam khang hynrei ka shah ban ai syrnot ST sha ki nongaplai kiba shim jait la ka long na u Kpa ne ka Kmie bad ka kynthei ka bym dei ka Khasi kaba shim jait na u tnga.”
Katkum ka jingong jong u Bah Paul, uno uno u ophisar jong ka Sorkar um don ka hok ban pynmih ïa kano kano ka hukum kaba ïatakhuh bad ka Aiñ ba la mynjur da ka KHADC.
“Ha ka jingïasyllok, kaba nyngkong eh ka jingïakren ka long ba ka aiñ kaba ïadei bad ka jingai jait ladep ban mynjur ha ka dur jong ka Bill da ka KHADC bad kane ka Bill ka la ioh ruh ïa ka jingmynjur na u Lat ka Jylla Meghalaya, namarkat, ka la long ka aiñ bapura. Haba u Lat u la shon muhor kaba mut ba ka la ïaid lyngba ki lynti ba la dep bishar da ka tnat DCA bad ka la ioh ïa ka jingmynjur, yn ym don uno uno ruh u ophisar ka Sorkar Meghalaya uba don ïa ka hok ban pynmih ïa ka hukum kaba ïatakhuh bad ka Bill kaba la long ka Aiñ kaba la don lypa shwa ban pynmih ïa ka Administrative Order. Namarkata, ngi lap ba dei ban pyndam ïa kane ka hukum bad ka jingïalang ka la mynjur ba dei ban pynduh shisyndon ïa kane ka hukum,” u la ong.
U la ïathuh ba ki don ruh ki kyndon ba la pynmih ha kaba ïadei bad ka jingai ïa ka syrnot SC/ST lyngba ka Office Memorandum (OM) kaba 19 tarik, Lber, 2014 sha ki Deputy Commissioner jong ka East Khasi Hills bad ka West Khasi Hills Districts.
“Halor kane, ka syrnot ithuh jinglong Khasi ka dei kaba donkam bha ïa baroh shwa ban aplai ïa ka syrnot ST, ha kaba nyngkong eh ban ioh ïa ka syrnot ithuh jinglong khasi ba la ai da ka KHADC,” ong shuh shuh u Bah Paul.
“La rai ruh ba ïa ka OM yn pynbeit noh mardor da kaba pynrung ïa ka kyntien, “ïa ka Tribe certificate na ki bor ba dei peit na ki jaka ba hap hapoh u pud u sam jong ka KHADC,” kan long kum kawei na ki kyndon,” la ong u Myntri bad ïathuh ruh ba u la soi bad mynjur ïa ka File kaba ïadei bad kane ka rai.
Haba kylli, kaei ka jingpynshitom ïa u ophisar uba pynmih ïa ka hukum be-aiñ, u Bah Paul ula ong, “ïa mynta, kaba ngi la leh ka long ban pynbeit ïa kaba bakla,” bad bynrap ba ki syrnot ST ba la ai katkum ka hukum ba ladep pynmih yn shu khein ïap noh.
