Shillong, Jymmang 03: Ka Awaken India Movement (AIM) Meghalaya State Unit ka la pan jingshai na ka Directorate of School Education & Literacy (DSEL) ka Sorkar Jylla halor ka jingpynkylla ïa ki skul ai jinghikai sha ki jaka sumar nongpang bad pynrung kyrteng ïa u Aadhaar.
Ka Awaken India Movement (AIM) Meghalaya State Unit ryngkatlang bad kiwei pat ki State Unit kiba don ha manla ki Jylla jong ka Ri India ka la ïakynduh lang ha ka Jylla Hyderabad ha kine ki sngi ba ladep lyngba ka National Meeting Central Body jong baroh kawei ka Ri India.
U Chairman jong ka AIM, Meghalaya State Unit Bah Banshai Marbaniang, u iathuh ba ha ka jingialang la shim ia ki rai kiba bun ka la mih shakhmat ban kyrsiew da jingïatylli ha ka ban ïeng ïada namar ki para bynriew halor ka jingshah pynbor ban ai DAWAI bad AADHAAR ynda hadien ba la ïohi bad sakhi halor ka jingpyrshang jong ka Sorkar Kmie kumjuh ki Sorkar Jylla bapher bapher.
“Kane ka long ban wanrah ïa ka pyntreikam bakla khlem da ailad halor ka Synshar Paidbah ha manla ki ïit ki Hima katkum la ki Shnong bapher bapher khamtam hapoh ka Jylla Meghalaya kaba don la ki jong ki Autonomous District Council bad ba dang hab hapoh ka Minority Status jong ka Riti Synshar Paidbah (Constitution) jong ka Ri India,” ong ka AIM.
Haba ïoh ïa ki jingpynsngew da ki Kmie ki Kpa jong ki Khynnah Skul lyngba ki skul sorkar jong ka Jylla ha kaba shah pynbor ban phah ïa ki khun jong ki ha kaban pyndep ïa ki Blood test, weight bad height measurement kumjuh bad kiwei pat ki rukom ai jingsumar dawai halor kiba bun rukom khlem da don ka jingtip bad jingpynshai paidbah khamtam lyngba ki Kmie ki Kpa kiba ri ba sumar ïa la ki jong ki khun.
“Kane ka la kylla long ka lynti kaba wanrah ïa ka jingbakla shikatdei eh halor ka longbriew manbriew ha sla pyrthei. Haba phai halor ka rukom jingïada khamtam ban pynbor khlem da ïoh jingmynjur lyngba ki nongri nongsumar ka long kaei kaei ka bymlah ban pdiang lada pyrkhat halor ka hok bad jingshisha,” ong ka AIM.
Ka kynhun Awaken India Movement (AIM) kaba don hapoh ka Jylla Meghalaya ka la pynpaw ïa ka jingsngew artatien haba ïohi ba ka la don ruh ka jingshah pynbor jong ki Khynnah Skul ban pyndep ïa u Aadhaar bad ynda haba la wad bniah la shem ba na ka liang jong ka Supreme Court badon burom ka la ai ïa ka rai kaba skhem ban pynpaw ba ymdei ban pyntreikam ïa u Aadhaar hapoh ki jaka pule skul bad ym ruh ban shim naduh kaba sdang ban pynrung skul ïa ki khynnah pule.
Kumjuh haba phai sha u Education Minister jong ka Sorkar India u Shri. Dharmendra Pradhan ula pynpaw ïa kajuh ka phang ba ym dei ban pynbor ïa ki khynnah pule ban leh Aadhaar bad kim dei ruh ban duh kino kino ki jingmyntoi haba kum ki khynnah skul kidei ban ïoh. Kane ka la long ka mat kaba hakhmat eh ha kaba bun na ka liang jong ki MP Cabinet Minister kila pynpaw.
Ka AIM ka la pyrshang ban wad bad tihbniah halor kaei ka bynta kaba kongsan haduh ban wanrah ka jingkulmar ïa ki khynnah skul khamtam na bynta ki kmie ki kpa jong ki haduh ban pynlong kum ka jaka ai jingsumar ïa ki khyllung khynnah hapoh ki Skul bapher bapher da kaba shim ïa ki kum ki nongpang ha kum kitei ki bynta kiba khlem da ïoh jingpynshai pura nalor ba ki Khynnah Skul kim don kano kano ka jingpang hapoh ka met jong ki.
“Kum ki briew ngi dei ban kyndit bynriew noh namar bunsien kiwei pat ki jait dawai bapher bapher halor kiba bun ki bynta kiba dei banrung shapoh ka met longbriew manbriew ki don ïa ka jingktah (Side Infections) hapoh ka met, ha kaba ngi kum ki briew ngim lah ban tip pura ïa kane. Ngim lah ruh ban tip shai balei kumta ka jia bad lada dei ba ki Doctor baroh ki hap ban pynshai lane ban ïathuh ïa kane nga ngeit ba yn ym don ruh ki ban leit shim dawai ne wat dih Dawai,” bynrap ka AIM.
Na ka liang jong ka AIM Meghalaya State Unit ka pan ïa ka jingpynshai kaba pura lyngba ka Sorkar Jylla bad ngi hap ban buh ka jingkylli ba halor kaei kadaw bah kaba pynlong ïa ki khynnah skul ba kin hap ban ai dawai haba leit skul da jingkoit jingkhiah” bad “Ka jingbuh ïa ki Skul na bynta jong ngi ki briew ka long ban leit pule na bynta ban ïoh ïa ka jingnang jingstad, ne la ka skul kadei ruh ban long kum ka Hospital ka ban hap ban sumar Nongpang?”.
Ka AIM Meghalaya ynda haba ka la pyrshang ban leit ïakynduh ïa u Education Minister jong ka Sorkar Jylla Meghalaya Shri. Rakkam A Sangma bad u Director jong ka DSEL Shri. Swapnil Tembe, IAS, ym shym la ïoh lad ban ïakynduh bad khlem da pynslem la hap ban leit ïakynduh ia u Joint Director jong ka DSEL u Bah L. Lyngdoh.
Kane ka jingleit kynduh ka long ban ai ïa ka jingthoh bad ban pan ïa ka jingpynshai kaba pura halor kine ki bynta kumba la shem bad ïohi. Na ka liang jong u Joint Director u la pan por ban pynshai haduh ka taïew kaban sa wan halor kiba bun ki bynta jong kane ka bynta kaba wanrah ïa ka jingsumar jingpang hapoh ki Skul bad ban phah wanrah Aadhaar ïa ki Khynnah skul.
Ka AIM Meghalaya State Unit ka la phah da ka jingthoh shapoh ka Directorate of School Education & Literacy, Govt. of Meghalaya ban pynpaw halor kiba bun ki bynta ha kaba ïadei bad ki Khyllung Khynnah kiba dei ban ïoh ïa ka jingpule kaba pura da kaba pynkulmar jingmut ha kaban wanrah noh sha ki jaka ai jingsumar bad kiwei kiwei.
“Lada pyrkhat jylliew shuh shuh baroh la shim ba kane ka long ka bynta kaban wanrah ïa ka jingïaleh pyrshah namar ka imlang sahlang ïa la ki jong ki aiñ kiba don hapoh ka Ri India bad ka Jylla baroh kawei bad kumjuh halor ka jingim briew man la iwei pa iwei lada phai khamtam katkum ki khyrnit jong ka Hok ba dei ban ïoh kum ki nongshong shnong hapoh riti Synshar paidbah jong ka Ri India,” ong ka AIM.
Kumba la kdew shai katkum ki khyrnit ter ter naduh 14 haduh 22 bad kumjuh lada phai halor jong ka Right of Children to Free and Compulsory Education (RTE) Act 2009, Human Rights Education with Children bad shuh shuh la sakhi ruh ba kine baroh kiba ka Sorkar ka ïalam ban pynïaid bakla lada phai halor ki rai kiba na ka liang jong ka Supreme Court ka la shim ban pynpaw paidbah, ong ka kyrwoh kaba la phah da u Bah Banshai Marbaniang shongknor ka AIM ha Meghalaya.
