Shillong, K’Lyngkot 04: U Bah Teiborlang Pathaw u la hap ban pyndem ha ka sur jong ki nongkyrshan bad ki paidbah kiba la rai da kawei ka sur ba u dei ban aireng kum u kyrtong shimet ha ka elekshon MDC sha ka Khasi Hills Autonomous District Council (KHADC) ka ban sa long ha ka 21 tarik Rymphang, 2025.
Ka sur jong ki nongkyrshan kaba mih ha ka jingïalang kaba la pynlong ha ka sngi Saitjaiñ da ka Mawlai Social Service Organisation (MSSO) ka long ba u dei ban mih noh na ka National Peoples Party (NPP) ïa kaba u la pdiang mon sngewbha da kaba pynbna ruh ba un mih noh na ka NPP bad ban phah noh ïa ka shithi iehnohkam.
Baroh ki nongkren ha ka jingïalang ki la pynpaw ka jingsngew khohñïoh lada u Bah Teibor un dang bteng ban aireng na ka tiket jong ka NPP ha ka elekshon MDC.
Ka jingkhot pynlong jong ka Mawlai Social Service Organisation (MSSO) ïa kane ka jingïalang ka long hadien u Bah Teibor u la pynbna ba un ym ïakhun shuh ïa ka elekshon MDC bad mar mar ki nongïalam ba hakhmat ki la kynduh kyrkieh ban pan jingshai bad hadien ka jingïakren kaba la neh la katto katne bnai u Bah Teibor u la kular ban ïakhun biang ïa ka elekshon bad ban shim ruh ïa ka rai na ka sur jong ki paidbah nongkyrshan.
Kum ban shu pynkynmaw, u Bah Teiborlang Pathaw u la jop ïa ka elekshon MDC ha u snem 2019 kum u kyrtong shimet bad tang hadien katto katne por u la leit ban pynïasoh bad ka United Democratic Party (UDP) hynrei shwa ka elekshon 2023 u leit ban pynïasoh noh bad ka National Peoples Party (NPP) tad haduh kine ki sngi. U la long ruh u Executive Member (EM) hapoh ka Executive Committee ba la ïalam ka NPP ha kaba u Bah Pynïaid Sing Syiem u la shimti ban long kum u Chief Executive Member (CEM).
