Shillong, Risaw, 26: Da ka jingïakhih kaba tyngeh haduh lai bnai kynthih jong ki nonghikai ka skulbah NEHU kiba don hapoh shatri jong ka North Eastern Hill University Teachers Association (NEHUTA), u Vice Chancellor Prof. PS Shukla u la hap ban pyndem da kaba khot ia ka jingialang jong ka Academic Council ban ioh ia ka jingmynjur ha kaba iadei bad ka jingpyntreikam ia ka National Education Policy (NEP).
Ha ka jingiakren bad ki lad pathai khubor hadien ba la wai ka jingialang jong ka Academic Council kaba la long ha ka sngi Palei u President jong ka NEHUTA Prof. Lakhon Kma u la iathuh ba ka jingpyrshah jong ka Assocation ban pyntreikam ia ka National Education Policy (NEP) naduh lai bnai mynshwa ka long namarba u Prof. Shukla u la iuhroit ia ka iktiar jong ka Academic Council da kaba ñiew pynban ia ka Executive Council kum ka bor kaba halor jong ka skulbah NEHU.
U la iathuh ba ha kane ka jingialang jong ka Academic Council, la shim ia ka rai ban pyntreikam noh nangne shakhmat ia ka National Education Policy (NEP) na ka bynta ka Four Year Undergraduate Programme (FYUP) bad ha kaba iadei bad ki samla kiba dang pule ha ka First Semester ka North Eastern Hill University Teachers Association (NEHUTA) ka la dawa ia ki bor pyniaid ban pynjlan shwa ia ka jingai jinghikai sa shi bnai kynthih hynrei ym ban shu pynlong noh ia ka eksamin ha u bnai Naiwieng lane Nohprah, 2023 namarba ki samla pule ki la shu duhei ia ki jingioh jinghikai na ka daw ka jingbym iasngewthuh jingmut hapdeng ka North Eastern Hill University Teachers Association (NEHUTA) ka Meghalaya College Teachers Association (MCTA) bad u Vice Chancellor jong ka skulbah NEHU u Prof. PS Shukla.
U la iathuh ba kane ka jingpyndem jong u Prof. Shukla ka long hadien ba ka NEHUTA ka la ujor sha ka President jong ka Ri India ka Droupadi Murmu bad sha u Lat ka Jylla u Phagu Chauhan.
Shuh shuh u la iathuh ba ka jingkhot jong u Prof. Shukla ia ka jingialang jong ka Academic Council ka long hadien ba ka jingaipor khatduh jong ka Joint Action Committee (JAC) kaba kynthup ia ka NEHUTA, NEHUNSA, MCTA, MeTTA-NEHU, NEHUSU bad kiwei kiwei ki kynhun kiba iasnohkti lang kan kut lashai ka sngi Thohdieng.
