Shillong, Jylliew, 14: U Myntri Rangbah ka Jylla Conrad Kongkal Sangma ha ka sngi balang u la phah da ka jingthoh sha u Myntri ka Ministry of Education, Skill Development and Entrepreneurship u Dharmendra Pradhan da kaba kyrpad ban tuklar lem halor ka jingeh ba ki samla pule ka Jylla Meghalaya ki la mad namar ka jinghap leit thoh eksamin Central University Entrance Test (CUET) shabar ka Jylla hapdeng ka jingpyntip kaba khim bha ka por.
Ha kane ka jingthoh, u Myntri Rangbah u la kyrpad ia u Dharmendra Pradhan ba un bthah ia ka National Testing Authority (NTA) ba kan pynbeit kyrkieh ia kane ka kam.
“Nga kwah ban pyntip sha phi ba ka Sorkar Jylla ka la ioh pdiang shibun ki jingujor na ki samla pule ka Jylla Meghalaya halor ka jingpynngat thoh eksamin CUET shabar ka Jylla kum ha Ranchi, Jharkhand, Jorhat, Dibrugarh, Kolkata bad sha ki Jylla ba shathie jong ka ri India,” ong u Conrad Sangma ha ka shithi.
U la pyntip ruh ba ki Admit Card ki dang poi sha ki samla pule ka Jylla ha ka step 14 tarik Jylliew, 2023 ba kin ialeh ia ka eksamin CUET ha ka 16 tarik Jylliew 2023, ba ka jingaipor ka la khim shaba palat ia ki samla pule ba kin pynkhreh ia ki jingdonkam ban leit sha ki jaka thoh eksamin nalor kaba wad ia ki jaka sah sha ki Jylla ba ki hap ban thoh eksamin.
U Conrad ula ong ba kum kane ka jingpynbeit jong ka NTA ka la pynduhlad ia ki samla pule ka Jylla Meghalaya ba kin ioh ia ka kabu ban bteng ia ki jingpule ha ki Central University kiba don ha kylleng ki Jylla ka Ri.
U la pynkynmaw ba ka Jylla Meghalaya ka ladep kyrpad mynshwa ia ka NTA ban buh ia ki CUET Centre ha baroh ki 12 tylli ki District ka Jylla Meghalaya ki ban long ha ki jaka pule kiba don lut ia ki jingdonkam baroh ha kaban lah ban pynlong ia ka eksam CUET.
U Myntri Rangbah u la kyrpad ia u Dharmendra Pradhan ba un tuklar da kaba bthah ia ka NTA ba kan pynbeit kyrpang ia ka jaka thoh eksamin na ka bynta ki samla pule ka Jylla Meghalaya.
