Shillong, Jylliew, 14: Ki nongri masi khem dud kiba don hapoh ka shatri jong ka East khasi Hills District Milk Union ha ka 14 tarik Jylliew 2023, ki la pynpaw ia ka jingsngew bitar halor ka jingpynmih hukum jong ka Sorkar ba yn ym shah shuh ban die ia ka dud masi na ka daw ka jingpang at snieh noh ha ki masi ia kaba la tip ruh kum ka Lumpy Skin Disease, khlem da ia phylliew jingmut shwa bad ki nongri masi bad ha kajuh ka por ruh khlem da leh shwa ia ka test ba ka long kaba bit neem ban dih ia ka dud masi ha shwa ban pynmih ia ka hukum katba ia ka dohkha la leh shwa ia ka test bad la pynmih ia ka hukum ban khang die ia ka dohkha.
Ka tnat Animal Husbandry and Veterinary lyngba u Secretary u Dr. Manjunatha C. ha ka 11 tarik u Jylliew, 2023 ka la pynmih da ka jingpynbna paidbah ba la khang ban die ia ka doh bad ia ka dud masi na ka daw ka jingpang at sniehnoh ha ki masi.
Ki nongri masi khem dud ki la pynpaw ba kane ka jingpynbna kaba khlem da ia phylliew jingmut ka la wanrah ia ka jingduhnong kaba khraw ia ki nongri masi namarba ha ka shisngi ki hap ban aibam bad ban bsa ia ki masi da ki hajar tyngka lada duna ki masi ba ki ri hynrei lada dei ia kiba ri kham bun ki masi ka la ktah da ki lak tyngka ka jingduhnong.
Ki la iathuh ruh ka dud kaba ki khem ki dei na ki masi kiba koit ba khiah ym na ki masi kiba don jingpang namar ba ka masi kaba pang kam lah hi ruh wat tang ban pynmih ia ka dud.
