Shillong, Lber, 17: Kawei ka pla rong iong ba la shu iehnoh kumto harud surok ha Laitumkhrah Point ka la pynher syrngiew lut ïa ki nongïaid nongieng ha ka step Lah Sngi u Blei.
Ki Pulit jong ka Laitumkhrah Police Station kiba la ïoh jingtip halor kane ki la pyntip noh marmar sha ka kynhun Bomb Squad jong ka tnat Pulit ban wan khura ïa ka pla khnang ban pynthikna ïoh don eiei ki tiar kiba lah ban pynmynsaw ïa ki riewpaidbah kiba ïaid lynti.
Ïa kane ka pla la buh hajan kawei ka dukan die waidong kaba don markhap bad ka Parking Lot ba dang shu shna thymmai ha Laitumkhrah, Shillong.
Ki Pulit ka kynhun Bomb Squad ynda la plie ïa ka pla ki la shem pynban ba ym don satia kino kino ki tiar pynmynsaw hynrei ka don tang ka laptop, ki dawai dashin, ki tiar shimet, ka mobile phone bad kiwei kiwei ki tiar.
Hadien kane, ki Pulit ki la rah noh ïa kane ka pla sha thanat bad ban wad ïa u trai jong kane ka pla.
