Shillong, Nailur, 03: U Myntri Sorkar Pdeng uba khmih ïa ka tnad Jngoh Kai u Gajendra Singh Shekhawat ha ka sngi Baar u la ïaroh ïa ka jingriewspah bad ïa ka mariang jong ka Meghalaya ha ka jingleit jngoh ïa ki katto katne ki jaka jngohkai pyrthei ha South West Khasi Hills District.
U la ong ka lad ka bun bha ha ki kam jngoh kai jong ka ri khamtam ha ka thaiñ Shatei Lammihngi bad ha Meghalaya.
“Ka Meghalaya ka don ïa ka lad ban kyntiew ïa ki kam jngoh kai ha ka jylla. To baroh ngin leit bad sakhi ïa ka Meghalaya, ka deiriti bad ka jingitynnad jong ka mariang ha kane ka jylla,” la ong u Shekhawat.
U Myntri da lade hi u la leit jngoh markhmat ïa ka Hot Spring ha ka shnong Jakrem, ka Synrang Mawrin ha ka shnong Mawten, ka Mawkyrduk Monolith (Tynrong) ha ka shnong Mawlangwir bad ka Mawranglang Viewpoint ha ka shnong Mawranglang.
Ha ka jingleit jngoh jong u ïa kine ki jaka, ka kynhun Ki Sur Ki Nongkyndong ka la rwai ïa ki jingrwai tynrai bad ka kynhun Ri-Maram Folk Academy na Mawlangwir ka la pyni ïa ki jingshad tynrai.
U Shekhawat u la ïaroh ïa ka jingtrei shitom jong ki ban pynlong ïa kane ka prokram ha kane ka jaka jngoh kai ba la kyntiew da ka Sorkar Jylla.
U Shekhawat u la ban jur halor ka jingkongsan jong ka kam jngohkai ha ka jingïaid lynti ka India ban long ka ri kaba la kiew shaphrang shuwa u snem 2047.
“Baroh ngi tip ba ka ri jong ngi hapoh ka jingïalam jong u Myntri Rangbahduh ka ri u Narendra Modi ka dang ïaid ha ka lynti ban long ka ri kaba la kiew shaphrang shuwa u snem 2047. La ithuh ïa ka India kum kawei na ki ri ha ka pyrthei ba kiew sted tam ha ka ïoh ka kot bad ki lad ki lynti kiba don ha ka kam jngoh kai ki dang kham bun katba dang ïaid ki sngi,” u la bynrap.
U la ong ruh ba kiba bun na kine ki lad ki don ha ka thaiñ shatei lammihngi bad khamtam ha Meghalaya. Baroh ki jylla ka thaiñ shatei lammihngi ki la ïoh ka jingkyrkhu ha ka liang jong ka jingiar ka deiriti bad ka jingitynnad ka maariang.
U la ïathuh ruh shaphang ki jingïakren jong u bad ki Myntri kiba khmih ïa ki tnad Jngohkai Pyrthei jong ki Sorkar Jylla, ki Union Territory na ka thaiñ Mihngi bad ka thaiñ Shatei Lammihngi ha ka Lah Sngi u Blei ha nongbah Shillong ïa kaba la pynlong ban sngewthuh bad kyntiew ïa ki lad kiba don ha ka kam jngohkai ha ka thaiñ Shatei Lammihngi. Ki jylla ki la pyni ïa ki rukom treikam jong ki ha ka kam jngoh kai ha kaba ki la ïasam ïa ki jingjop bad ki jingeh.
“Ki Sorkar Jylla ki la ïathuh ïa ki jingpynkhreh kam jong ki bad ki lad kiba don ha kane ka jingïalang hynnin ka sngi bad nga ngeit skhem ba ki thong kiba heh jong ki kin plie ïa ki lad ïa ki nongjngoh kai ki ban wan sha ki jylla ban sakhi ïa ka deiriti, ki jaka ba itynnad bad ka suinbneng kaba pyngngad,” u la ong bad bynrap shuh shuh da kaba ong, “ka jingkyntiew ïa ka kam jngohkai kan wanrah ïa ka jingkylla kaba khraw ha ka jingim jong ki briew, ka ïoh ka kot jong ki kan kiew, ka rukom im jong ki kan kylla bad nga kyrmen ba ha kine ki por ki ban wan, ka kam jngoh kai kan kyntiew ïa ka ïoh ka kot jong ki jylla ka thaiñ Shatei Lammihngi.”
U MLA ka Mawkyrwat Constituency u Bah Renikton L. Tongkhar u la aiti ïa ka dorkhas ha u Shekhawat ryngkat ka jingsakhi lang jong ki dkhot na ka Dorbar Shnong Mawten, u Principal jong ka Sngap Syiem College Mawkyrwat bad u Rangbah Shnong jong ka Dorbar Shnong Mawlangwir.
U Myntri Sorkar Pdeng u la ong ruh ba un leh ïa kaba donkam ban pynbeit ïa ki jingeh jong ka thaiñ bad u ong ruh ba ka Sorkar India hapoh ka jingïalam jong u Narendra Modi ka ieng skhem ban kyntiew ïa kine ki jylla ka thaiñ Shatei Lammihngi bad ki lad kiba don ha ka kam jngoh kai ha kine ki jylla kiba itynnad.
Hadien kane, u Myntri u la pynïaid ïa ka jingïalang ban lum jingtip shaphang ki skhim kiba ïadei bad ki kam Jngohkai ha ka distrik.
Ha kane ka jingïalang, u Myntri u la tohkit shaphang ka jingwan jong ki nongjngoh kai, ka jingpyntreikam ïa ki Homestay ha ka thaiñ bad u la peit bniah ïa ki skhim bapher bapher ba kynthup ïa ka Mahatma Gandhi National Rural Employment Guarantee Act (MGNREGA), ka Pradhan Mantri Adi Adarsh Gram Yojana (PMAAGY), ka Prime Minister’s Employment Generation Programme (PMEGP), ka Community-Led Tourism Infrastructure Scheme (CLTIS) bad kiwei kiwei ki sienjam ba thmu ban kyntiew ïa ka kam jngohkai ha ka distrik.
Ha ka jingïalang la ïakren ruh shaphang ki kam bad ki prokram ban kyntiew ïa ka kam jngoh kai ha ka distrik, kumjuh ruh ka jingkongsan ban tei ïa ki Homestay bad pynthikna ïa ka jingdon ki jingdonkam kum ki jaka bam ha ki jaka jngohkai.
