Shillong, Rymphang, 23: Arngut ki briew kiba la shah kem halor ka jingpynïap dusmon ïa uwei u heprit uba dang shiphew snem ka rta ha ka shnong Umtangar, Ri Bhoi ki la phla ba ki la leh ïa kane ka kam runar tang namarba une u heprit u la pyrshang ban rah ïa ka kiad ba dang sah sa shiteng bilor kaba dei ka jong uwei na kine ki arngut.
U Pynshailang Warjri, 32 ka rta na Umtangar bad u Banshngaiñ Tynsong 28 na Pynursla ki la shah kem ha ki Pulit ha ka sngi Palei.
“Ha ka jingtohkit ïa kine ki arngut, la lap ba u lanot u la sah ha ka sem jong uwei na kiba la shah kem ha ka janmiet jong ka 17 tarik, Rymphang. Ha ka step jong ka 18 tarik, Rymphang, u lanot u la pyrshang ban rah ïa u bilor ba dang don bad ka kiad kaba dei jong uwei na kiba la shahkem. Ha ka jingbitar, u Banshngaiñ Tyngsong bad u paralok ki la beh thong ïa u nadien bad ki la pynïap ïa u da ka tangon da ka pla na ki bynta ka durkhmat,” la ïathuh u SP ka Ribhoi Jagpal Singh Dhanoa.
“Hadien kata, ki la buhrieh ïa ka met hajan kawei ka lawbniap bad ap haduh ban da kem iongreiñ ka bneng ban kit pat ïa ka met jong u lanot sha ka kper jong u Bah Comand Nongrah. Ïa uba donkti lang ruh ngi la kem,” u la ong.
U SP u la ong ba ka jaka ba la jia ka jingshah pynïap yn sa tohkit shuh shuh khnang ba ki nongleh kam bymman kin da phla lut halor kane ka kam runar.
