Shillong, Naitung 13: Ka shlem pyninam, Bharat Bangla Art Fest ba la pynlong ha Academy of Fine Arts ha Kolkata ka la pyninam ïa ki durthoh naduh 7tarik haduh 12tarik Naitung, 2024 ba la pynkhreh da ki synjuk barikor Bangladesh Artists Group bad Santiniketan Kala Bhavan Praktoni.
Ha kane ka pyninam bakynsai la shim bynta da 117 ngut ki barikor na Bangladesh bad India, kynthup ïa u Bah Raphael Warjri na jylla Meghalaya.
Palat arspah tylli ki durthoh bad shidorjon ki durshtah la pyninam ha kaba la kynthup kyrpang ïa ki durthoh jong u Jogen Choudhury bad ki durshtah jong u Janak Jhankar Narzari na India,kumjuh ruh jong u K M A Quayyum bad Prof Hamiduzzaman Khan na Bangladesh.
Ïa kane ka jingpyninam la kyrshanda ka Bangladesh High Commission ha Kolkata, ka ba la thmu ruh ban kyntiew ïa kane ka rong ka taw sh ka shlem pyninam ha satlak pyrthei, da ka jingthmu ban ïasam markylliang ïa ki jingtbit bad jingtip na ki arliang ki Ri Bangladesh bad India bad hadien yn sa kynthup ruh ïa kiwei kiwei ki Ri ba markhap pud bad kiba sha shiliang duriaw.
