Shillong, ‘Nailur 29: Ki nongrep ha ka shnong 15 Miles kaba don sha ka thaiñ Ranikor, South West Khasi Hills District sa shisien ki la mad ia ka jingduhnong kaba khraw hadien ba ka kynhun ki hati khlaw ki la pynjot pynpra ïa ki mar rep bad ïa ki ïing sah jong ki nongrep.
Ka khubor ba la ïoh lum na ka Ranikor Area Farmers Association (RAFA) lyngba u President Bah Micheal Lyngdoh bad u Secretary u Bah Kyrmen K. Ryja, ki la ïathuh ba ka kynhun ki hati ki la wan ban pynjot biang ïa ki ïing sah bad ïa ki mar rep hynnin ka miet sngi Saitjaiñ.
“Ki mar rep ba ki hati ki la pynjot ki kynthup ïa ki dieng kwai, ki soh trun bad ki dieng kait”, ong ka RAFA.
Ka Ranikor Area Farmers Association naduh u snem 2023 ka la leit ban ujor sha ka tnat Wildlife bad kumjuh ruh ha ophis jong u Deputy Commissioner ka South West Khasi Hills District hynrei kane ka shu kut tang ha jingkular khlem poi shaei shaei ruh. Ka tnad Wildlife ka la wan jngoh bunsien bad ki la kular ruh ba ynsa ai jingïarap ïa ki nongrep kiba la shah ktah bad na ka liang ka RAFA ka la phah ruh ïa ki kot ki sla jong ki nongrep hynrei kane ruh kam haduh mynta kam pat shym seisoh ei ei.
Ha u snem ba ladep ka RAFA ka la pynlong ïa ki jingïalang paidbah bad la shim ruh ïa ka rai ban siat ïap noh ïa ki hati hynrei tang shi sngi ar sngi ki bor ba dei khmih ki la kyrpad ban ym leh kumta bad ki la kular ban shimkhia da ma ki, hynrei phewse kane ruh kam larkam.
“Ka long kaba sngewsih ruh ïa ki paid nongrep haba u MLA jong ka Ranikor Constituency u Bah Pius Marweiñ u la kren ha Assembly halor kine ka jingjia, hynrei u Myntri Rangbah ka Jylla Meghalaya u Conrad K. Sangma u ong pynban ban ïasah lang bad briew bad mrad bad kane ka mut la kheiñ ïa ki nongrep jong ka thaiñ Ranikor kum ki mrad,”la ong ka RAFA.
Ka RAFA mynta ka kyntu ïa u Myntri Rangbah ka Jylla ba jurip hi da lade bad wan sah lang bad kine ki hati khlaw khnang ba un sngewthuh haduh katno ka jingeh ba ki nongrep ki mad.
“Hato kat kane ka jingshahpynjot ha ki hati khlaw ba wat ïa ki ïing ki sem, ki dieng ki siej ki dang lah ban pynjot hato ïa ki briew lei tharai yn nud hi ban leit tang hajan? Kaba kut kan long tang ka jingjaw ummat ïa ki paid nongrep jong kane ka thaiñ. Lada kan long kumne shi kumne ngim banse ban lum biang ïa ki paid nongrep ban shim biang da kiwei ki rai ba kham tyngeh”, ong ki nongïalam ka RAFA.
