Shillong, Nailur 30: Ka Khasi Author Society kaba la lamkhmat ban pynkhih ia ka jingdawa ban ioh jingithuh ia ka ktien Khasi ha ka Khyrnit Baphra jong ka Riti Synshar ka Ri India, ha ka sngi Saitjaiñ ka la pynlong da ka jingiakhih kaba jai jai ha Jantar Mantar, New Delhi.
Ia kane ka jingiakhih bajaijai jong ka KAS, la kyrshan lang da ki kynhun bad ki sengbhalang bapher bapher na rilum Khasi bad Jaiñtia bad ki Myntri Sorkar ba kynthup ïa u Bah Paul Lyngdoh bad ka Dr. Ampareen Lyngdoh, bad kiwei ki riew rangbah bapaw kum i Bah Hamletson Dohling, Lambor Malngiang, Samlin Malngiang, Lamphang Blah, Teibor Pathaw, Raynold Kharkamni, Banri Lyngwa bad ki sengsaiñpyrthei bapher bapher.
Ki nongkren ha kane ka jingialang ki la pynpaw ba ka Ktien Khasi ka ladei hok ban ïoh rung ha ka Khyrnit Baphra jong ka Riti Synshar jong ka Ri katkum ka Article kaba 29.
Kane ka jinglamkhmat jong ka KAS ban pynlong da ka jingiakhih kaba jaijai ha New Delhi ka long ka buit ba thymmai kaba ym pat ju leh mynno mynno ruh bad dei halor kane ka nongrim ba ki Myntri ka Sorkar Jylla ki la iashim bynta lang ha kane ka jingiakhih.
Ki nongïalam jong ki Sengbhalang, ba kynthup ia ka KSU, FKJGP, HYC, HANM, JSU bad CoRP ki la pynpaw ïa ka jingkyrmen ba kane ka jingtylli lang hapoh kawei ka sur kan pynurlong ia ka jingangnud ba ka Ktien Khasi kan rung noh ha ka Khyrnit Baphra ka riti synshar ka ri India.
Ka Jantar Mantar ka la sawa ruh da ka sur jingrwai, Khynriam u Pnar u Bhoi u War u dei u paid Khasi baiar ha ka nohphai sngi ba la pynlong ia ka jingiakhih kaba jar jar.
Ki dkhot ka Hynñiewtrep Delhi Association bad ki Khasi kiba trei bad pule ha New Delhi ki la ai jingkyrshan da ka jingiashim bynta lang ha kane ka jingiakhih jong ka KAS.
Ha nongbah Shillong, ka KSU ka la teh ia ki banner kylleng ki jaka paidbah ban pynpaw sha ka Sorkar Pdeng ia ka sur jingdawa jong ka jaidbynriew Khasi ban ithuh noh ia ka Ktien Khasi.
