Shillong, Jymmang 26: Ka Khasi Author Society (KAS) ka la pynkhreh ban pynmih paidbah ïa ka Dictionary Khasi-Khasi-English ïa kaba ka jaidbynriew Khasi-Pnar kan sa ïoh shen.
“Ka jingïaid shaphrang ka jingpynkhreh ïa ka Khasi-Khasi-English Dictionary ka dei projek kaba la bei tyngka da ka tnat Arts and Culture ka Sorkar Jylla bad ka Khasi Hills Autonomous District Council (KHADC). Kane ka projek ka la ïaid mynta lai snem,” ong u President ka KAS u Dr. DRL Nonglait ha ka jingïakren bad ki lad pathai khubor ha ka sngi Saitjaiñ.
“Ngi la thmu ban pyndep hapoh lai snem hynrei ka kam ka dei kaba ïar bad lehse sa tang hapoh shisnem ngin sa lah ban pyndep ïa kane ka kam,” u la ong
“Ngin sa buh ïa ki Phonetic Signs ki ban ïarap ïa ki nongpule ban kynnoh ïa ki kyntien Khasi. Kane kan dei ka banyngkong eh ba ka jaidbynriew Khasi kan pynmih. Ngin sa lah ban pyndep ïa kane sa hapoh shi snem,” la ïathuh u Dr. Nonglait.
“Ngi don kumba khatar ngut ki dkhot jong ka Research Team ba la khlieh da i Prof Badaplin War kum ka Chief Supervisor bad i Dr. Barika Khyriem na ka Department of Linguistic, NEHU kum ka Joint Supervisor. Ngi kyrmen ba kane ka Dictionary kan sa weng lut ïa ki jingspeldak, ki jingïasnoh kyntien, ki jingkynnoh,” la ong shuh shuh u Dr. Nonglait.
“Ha ka jaidbynriew ngi don ïa ki ktien tnat kum ka ktien Pnar, Lyngngam, Jirang bad kiwei kiwei kiba don la ki jong ki rukom spel dak. Ka ktien pdeng kan long katkum ka Dictionary ba ngin sa pynmih ha ki khyndiat snem ki ban sa wan,” la bynrap u Dr. Nonglait.
