Shillong, Rymphang, 21: Ka Sorkar Jylla ka la pan jingïarap pisa na ka Sorkar Pdeng na ka bynta ban tei ïa ka Administrative City bad ïa ka Knowledge City ha New Shillong Township (NST).
Haba kren ha ka jingwanrah ïa ka mang tyngka ha ka sngi Balang, u Myntri Rangbah ka Jylla Conrad K Sangma u la ong ba ïa ka jaka kaba heh 232 akar la aiti na ka bynta ban shna ïa ki building ha New Shillong Administrative City, ka ban don ïa ka Administrative Complex kaba heh ha kaba yn buh lang ïa ka Secretariat building bad ïa baroh ki ophis treikam jong ki Directorate.
Ka jingtei ïa kane ka Integrated Administrative complex la khmih lynti ba ka jinglut kan kot haduh T. 550 klur.
“Yn tei ruh ïa ka Unity Mall ha ka jinglut kaba kot kumba T. Rs 220 klur. Ka Administrative bad shlem treikam ki Pulit yn sa tei lang ryngkat bad ki jaka ïalehkai sports, bad kiwei kiwei ki jingdonkam ha kaba ka jinglut kan kot T. 1,200 klur,” u la ong.
Shuh shuh u Myntri Rangbah u la ong, ka Administrative City kan long beit thik tang na ka shlem treikam jong ka Sorkar, katba ka Knowledge City yn sa tei ha Mawkhanu-Mawpdang ha ka jingheh ka jaka kaba 808 akar ba la ïoh da ka Sorkar. Ka New Shillong Knowledge City kan long beit thik tang na ka bynta ka Sports, IT, Tourism bad ka Agro-logistic.
“Ïa ka Detailed Project Report (DPR) na ka bynta ban tei ïa kine ki shlem treikam ka ban kot haduh T. 5,400 klur ladep aiti sha ka Sorkar Pdeng,” u la ong bad bynrap ba ka jingshna ïa ki projek bapher bapher ha kine ki City yn sa bei da ka Sorkar Jylla, ka Sorkar India bad lyngba ki jingbei pisa na ki kynhun shimet.
U Myntri Rangbah u la ong ba kine ki ar tylli ki nongbah ba thymmai kin pynkha 50,000 hajar tylli ki kam.
Ïa ka surok kaba pynïasoh ïa ka Shillong bad ka Administrative City ha Umsawli bad hapdeng ka Administrative City bad ka Knowledge City ha Mawkhanu la mang pisa kumba T. 520 klur, u la ong bad ïathuh ruh ba ka jingmang pisa kaba kot T. 365 klur la bynta na ka bynta ki projek bapher bapher ha Administrative City bad ha Knowledge City na ka bynta u snem 2024-25.
