Shillong, Rymphang 21: U Myntri ka tnat Pule Puthi ka Sorkar Jylla u Rakkam A Sangma ha ka sngi Balang u la pyntip ba ki don 1241 ngut ki nongtrei hapoh ka SSA program ha Meghalaya bad ka Sorkar Jylla ka la pynlut pisa T. 12.72 klur ha ka shisnem ban siew tulop.
Haba jubab ïa ka jingkylli ba la wanrah da u MLA ka Nongkrem u Bah Ardent Miller Basaïawmoit halor ka jingbym lah jong ka Sorkar ban pynkiew ïa ka tulop jong ki nongtrei hapoh ka SSA program ha Meghalaya, u Myntri u la ïathuh ba ka pisa ba la mang na ka bynta ka tulop la siew da ka Management Monitoring Evolution and Research (MMER) jong ka Ministry of Education ka Sorkar India.
“Ka mang tyngka ba la mynjur da ka Plan Approved Board jong ka Ministry of Education ka Sorkar India bad ka pisa kaba hapoh kane ruh la kynthup lang bad kiwei kiwei ki kam kum ha kaba siew ïa ka bai leit bai wan, ka jingshim wai ïa ki kali, ka jingwad bniah, ka jingpynlut na ka bynta ki jingïalang ha ophis bad kiwei kiwei ki jingpynlut nalor kaba siew tulop ïa ki nongtrei,” u la ong.
U la bynrap ba ka MMER ka la ai pisa ha u snem 2022-2023 bad 2024 ka long T. 27.49 klur bad ka jingpynlut baroh ïa ka pisa haduh mynta ka long T. 12.46 klur.
Ka Tnat Pule Puthi ka sngewthuh ïa u synñiang u bynhei jong ki nongtrei ka SSA bad ka jingjop jong ki prokram ka SSA ha ka Jylla. Ka jingaiti lut bad ka jingtrei shitom ka la pyntyllun sani bha ïa ka pule ka puthi ha ka jylla, la bynrap u Sangma.
U la ong ba ka tnat ruh ka mynjur ban ai jingithuh ïa ka jingtrei shitom da ki nongtrei ka SSA bad ka jingpynkiew ïa ka tulop kan long ka thong khnang ba ki nongtrei kin kham trei smat bad ban pyntyllun shakhmat ïa kane ka prokram.
U ïathuh ba ka jingpynkiew tulop ïa ki nongtrei jong ka SSA ka long ha u snem 2016, bad ha ka 12 tarik, Ïaiong, 2023 ka executive committee hapoh ka jingïalam jong u Chief Secretary ka Sorkar Meghalaya ka la mynjur ïa ka jingtyrwa ba ïa ka jingpynkiew tulop dei ban ïasyllok shwa bad ka tnat Pla Tyngka bad kiwei kiwei de ki Society bad ki tnat sorkar.
“Ha kaba ïadei bad kane, ka tnat Pule Puthi ka la pynkhreh ïa ka Matrix bad ka ladep aiti sha ka Sorkar Jylla na ka bynta ban ai jingmynjur bad ban buh ryntih ïa ka jingsiew tulop sha ki nongtrei katkum ka Meghalaya Fifth Pay Commission,” u la ong.
“Da kaba pynshong nongrim na ka mang tyngka kaba shi snem la siew tulop T. 12.46 klur bad ka Revised Annual Budget ka long T. 23 crore, kaba pyni ïa ka jingïapher kaba T. 10.22 klur, ka Sorkar ruh ka la shimkhia bha ïa kane ka jingtyrwa bad dang ap ïa ka jingmynjur,” la ong u Sangma.
