Shillong, Risaw, 14: Ka Sorkar Jylla lyngba ka tnat Personal and Administrative Reforms (A) ka la pynmih ïa ka jingpyntip ha ka 9 tarik, Nailar, 2024 ban kyntiew kyrdan Meghalaya Civil Services ïa ki hynriew ngut ki shakri Sorkar kiba trei ha ki tnat treikam bapher bapher ka Sorkar Jylla.
“Ka seng kam don jingpyrshah eiei ïa ki hynrei ka kyrmen ba kin trei bha ïa ka kamram hynrei ka seng ka kwah ban buh jingkylli ïa ka tnat Personnel & A.R balei ba la kyntiew sha ka kyrdan Civil Services ïa ki shakri sorkar. Hato ka shonghok ban leh kumne lane hato kam dei ka ka jingleh shiliang namarba ka don ka jingïadei kaba jan,” la pynpaw ka KSU ha ka dorkhas.
“Lada ïa kino kino ki briew lah ban kyntiew sha ka kyrdan MCS, namarkata kam don jingmut shuh ban dang pynlong ïa ka eksamin MCS,” la kynthoh ka seng.
“Ngim tuklar bad ngim bishni ïa kine ki hynriew kiba la kiew sha ka kyrdan MCS. U Secretary jong ka tnat Personnel & A.R u Bah Cyril VD Diengdoh u la pynshai ba ka don ka Advertisement na ka bynta ki nongtrei sorkar ba ki lah ban aplai. Hynrei ngi la buh jingkylli, uei u synñiang jong kine ki hynriew ngut ki la ai?” la ïathuh u Chairman jong ka Employment Monitoring Cell ka KSU u samla Reuben Najiar ha ka jingïakren bad ki lad pathai khubor.
“Ngi lap ba u Sub Inspector na ka tnat Pulit u la shah kyntiew kyrdan MCS ka don jingïadei aiu ka kam Sub Inspector bad ka jingshah kyntiew kyrdan MCS,” la buh jingkylli une u nongïalam ka KSU.
“Ki (Secretary ka tnat Personnel & A.R) ka batai ïa ngi shaphang ki aiñ 1974 ki bym treikam shuh ha kane ka juk. Hato kane ka jingkiew kyrdan ka dei kaba khuid ba suba ne ka dei kaba ki don jingïadei bad ki katto katne ba ki ïoh kiew kyrdan,” ong shuh shuh u samla Najiar.
“Ngi dawa ïa ka jingthoh da ka jingpynshai na ka Sorkar halor u synñiang jong kine ki hynriew ngut bad hadien kata ngin sa shim da kiwei pat ki sienjam,” la ong u samla Najiar.
