Shillong, Naitung, 15: U President jong ka KSU Malki Circle u samla Ïashan Mukhim bad Assistant General Secretary u samla Mavian Jyrwa ha ka Lah Sngi u Blei ki la leit shah hajir hakhmat ki Pulit jong ka Sadar Police Sation, Shillong.
Ïa kine ki arngut ki nongïalam la synran lang da ki dkhot ka KSU Malki Circle bad u Vice President jong ka KSU Central Body u samla Biangbor Paliar katba ki dang rung shapoh ka thanat.
Ha ka jingïakren bad ki lad pathai khubor hadien ba la mih na Sadar Police Station u samla Ïashan Mukhim u la ïathuh ba ka jingshah khot hajir ha ki Pulit ka long halor ka jingmudui ejahar hi da ki Pulit pyrshah ïa u bad ïa u Assistant Secretary jong ka seng halor ka jingkhynra Work Permit ïa ki nongbylla bar jylla ha kaba la pharep ba ki dkhot ka KSU ki la ktah kti ïa ki nongbylla.
“Ka jingkhot (hajir) jong ki ka long ba ka don kawei ka ejahar bad haba ngi la kylli ïa kata ka ejahar ngi lap ba kam dei eiei hi ruh bad ka dei tang ka jingpharep suda. Kane ka jingleh jong ka tnat Pulit ka don jingthmu ban pynduh mynsiem ïa ngi, ban pyntieng pynsmiej ïa ngi. Hynrei ka kyrwoh kaba shai, kane ka jingleh kam don eiei ban pyntieng pynsmiej ïa ngi hynrei kan nang ai mynsiem shuh shuh ïa ngi ban ïakhun bad ban ïai dawa na ka Sorkar Pdeng ban pyntreikam noh ïa ka Inner Line Permit (ILP) bad khamtam eh ïa ka Sorkar Jylla ban pyntreikam noh ïa ka Meghalaya Residents Safety and Security Act (MRSSA),” la ong u samla Mukhim.
Haba kylli, u la ïathuh ba ka jingujor sou moto jong ki Pulit ka long halor ka jingkynnoh ba ki dkhot ka KSU ki jrong kti ïa ki nongbylla bar jylla.
Haba bynrap halor kane, u Vice President ka KSU u la ong, ba ka Sorkar ka kwah ban ñion. “Ka jingkhot jong phi manla ka sngi ka mut ba phin pyntieng hynrei kynmaw ba ki dkhot jong ka seng kin ïai khynra manla ka sngi ïa ki mynder bad kane ka dei ka kyrwoh kaba shai sha ka Sorkar.
