Shillong, Jylliew, 06: Ki dkhot ka Hynniewtrep Youths Council ha ka sngi Palei ki la pynpait ïa ka tala ba la teh kynjri ïa khyrdop jong ka paiñkhana paidbah kaba don ha Parking Lot hajan ka ophis Additional Secretariat, Shillong.
Kane ka paiñkhana paidbah ka dei kaba la peit bad pynïaid da ka Sulabh International hadien ba la shna lyngba ka Corporate Social Responsibility Scheme jong ka Antrix Corporation Ltd na Bangalore kaba dei ka shnat treikam jong ka Sorkar.
La lap ba ïa kane ka paiñkhana ka la khang tala shwa ka por ba ka Kong Bindas Syiemlieh kan poi ban shong shah thngan ha Parking Lot.
Ïa ka tala jong ka paiñkhana la pynpait ha ka por kumba 8:45 baje mynmiet khnang ba ka Kong Syiemlieh kan ïoh ban pyndonkam na ka bynta ban leit pynjhieh bad ban leit paiñkhana katba ka dang shong shah thngan ha Parking Lot.
